मयत विवाहितेच्या बहिणीने दिली तक्रार…..

पोईप | ओंकार चव्हाण : गोळवण येथील जयश्री बाळकृष्ण खरात या विवाहितेचा मृतदेह मंगळवारी दुपारी राहत्या घरात गळफास लावलेल्या स्थितीत दिसून आला होता. याबाबत पोलीस ठाण्यात आकस्मित मृत्यू म्हणून नोंद करण्यात आली होती. दरम्यान जयश्री हिच्या मोबाईलच्या कव्हरमध्ये एक चिठ्ठी पोलिसांना तपासादरम्यान सापडून आली. यात मुलबाळ होत नसल्याने पती शारीरिक व मानसिक छळ करतो त्यामुळे आपण आत्महत्या करत असल्याचा मजकूर नमूद असल्याचे पोलिसांनी सांगितले. याप्रकरणी पोलीसांचा तपास सुरू होता. काल मयत जयश्री हिची बहीण सौ. संतोषी संतोष वरक रा. कडावल कुडाळ यांनी मालवण पोलीस ठाण्यात तक्रार दिली. जयश्री हिचा पती हा मयत जयश्री हिचा मानसिक व शारीरिक छळ करत होता. मुलबाळ होत नसल्याने परत लग्न करण्यासाठी एका महिलेशी संबंध असल्याचेही त्याने जयश्री हिला सांगितले होते. जयश्री हिला आत्महत्येस प्रवृत्त करण्यात आले. अशी तक्रार पोलीस ठाण्यात देण्यात आली. त्यानुसार तिच्या पतीविरोधात मालवण पोलीस ठाण्यात आत्महत्येस प्रवृत्त केल्याप्रकरणी बाळकृष्ण खरात याच्या विरोधात गुन्हा दाखल करण्यात आला आहे व त्याला अटक झाली आहे. याप्रकरणी मालवण पोलीस निरीक्षक एस. एस. ओटवणेकर हे पुढील सखोल तपास करत आहेत.