महाराष्ट्राच्या मुलींचा गुजरातच्या संघावर दणदणीत विजय...!

४१ व्या युवा बास्केटबॉल राष्ट्रीय स्पर्धेचा पहिला दिवस महाराष्ट्रासाठी संमिश्र.

क्रीडा | विशेष : पुण्यातील चोंढे पाटील क्रीडा संकुलात सुरू झालेल्या सीएम चषक ४१ व्या युवा राष्ट्रीय बास्केटबॉल चॅम्पियनशिपच्या पहिल्या दिवशी, मुलांच्या आणि मुलींच्या दोन्ही गटांतील महाराष्ट्राच्या संघांना संमिश्र यश मिळाले. महाराष्ट्राच्या मुलींच्या संघाने गुजरातच्या संघावर '८४-६१' असा दणदणीत विजय मिळवला, तर दुसरीकडे मुलांच्या संघाला उत्तराखंडकडून ७५-१०८ असा मोठा पराभव पत्करावा लागला.

तत्पूर्वी भारतीय बास्केटबॉल महासंघाचे (बीएफआय) अध्यक्ष आधव अर्जुन यांच्या हस्ते चॅम्पियनशिपचे उद्घाटन करण्यात आले. याप्रसंगी केंद्रीय राज्यमंत्री मुरलीधर मोहोळ, महाराष्ट्र राज्य बास्केटबॉल संघटनेचे (एमएसबीए) अध्यक्ष संदीप जोशी, बीएफआयचे सचिव कुलविंदर सिंग गिल, एमएसबीएचे सचिव गोविंद कृष्णन मुथुकुमार आणि इतर उपस्थित होते. एमएसबीएचे सहसचिव ललित नाहटा यांनी आभार प्रदर्शन केले.

मुलींच्या गटात, महाराष्ट्राने पहिल्या क्वार्टरमध्येच २८-१३ अशी आघाडी घेत खेळावर नियंत्रण मिळवले आणि त्यानंतर मागे वळून न पाहता उर्वरित क्वार्टर्स १७-१५, २३-२१, १६-१२ अशा फरकाने जिंकून सहज विजय मिळवला. विजेत्या संघाकडून सिया भोसलेने सर्वाधिक १८ गुण मिळवले, तर शरण्या सावंत (११) आणि वैष्णवी परदेशी (१०) यांनी योग्य वेळी बास्केट नोंदवले. गुजरात संघाकडून आशी पटेलने १५ गुण मिळवले. 

मुलींच्या गटातील इतर सामन्यांमध्ये, स्मिता एस (१२) आणि करिश्मा के (१०) यांच्या महत्त्वपूर्ण कामगिरीमुळे तामिळनाडूने दिल्लीवर ७३-३२ असा विजय मिळवला.

मुलांच्या गटात, तामिळनाडूने पंजाबवर ९८-६७ असा एकतर्फी विजय मिळवला. जास्त गुणांचा पहिला क्वार्टर ३१-२४ ने जिंकल्यानंतर, तामिळनाडूने दुसऱ्या क्वार्टरमध्ये १९-१२ असे वर्चस्व गाजवत मध्यंतरापर्यंत १४ गुणांची भक्कम आघाडी घेतली. मध्यंतरानंतरही, तामिळनाडूने तिसरा आणि चौथा क्वार्टर अनुक्रमे २४-१५ व २४-१६ ने जिंकून आपले वर्चस्व कायम ठेवले. विजेत्या संघाकडून अरुणपांडी बी आणि कौशिक राज सिंग यांनी प्रत्येकी १९ गुण मिळवले. पंजाबकडून अमरिंदर मोहन सिंगने २२ गुणांचे योगदान दिले.

पहिल्या दिवसाचे निकाल खालीलप्रमाणे आहेत.

मुलींचा गट : केरळचा छत्तीसगड वर ७०-३३ ने विजय. महाराष्ट्राचा गुजरातवर ८४-६१ ने विजय. तामिळनाडूचा दिल्लीवर ७३-३२ ने विजय. कर्नाटकचा तेलंगणावर ६१-५१ ने विजय.

मुलांचा गट: तामिळनाडूचा पंजाबवर ९८-६७ ने विजय. केरळचा दिल्लीवर ७७-६३ ने विजय. राजस्थानचा गुजरातवर १०२-८५ ने विजय. उत्तर प्रदेशचा तेलंगणावर ७०-४१ने विजय. मध्य प्रदेशचा दिल्लीवर ८२-४१ ने विजय.