मुख्यमंत्री देवेंद्र फडणवीस यांच्या हस्ते २७ ऑक्टोबर रोजी 'सीएम चषक' ४१व्या युथ नॅशनल बास्केटबॉल स्पर्धेचे उद्घाटन. 

महाराष्ट्र राज्याकडे 'प्रदीर्घ कालावधीनंतर' यजमानपद..!

८ दिवसांत ५४ राज्यांच्या संघाचे १४४ सामने रंगणार असल्याची सिंधुदुर्ग बास्केटबॉल असोसिएशनचे सचिव अजय शिंदे यांची माहिती. 

क्रिडा | ब्यूरो न्यूज : पुणे येथे 'चोंधे पाटील स्पोर्ट्स कॉम्प्लेक्स' मध्ये २७ ऑक्टोबर पासून सुरू होणाऱ्या 'सीएम चषक' ४१व्या युथ नॅशनल बास्केटबॉल चॅम्पियनशिपसाठी सर्व तयारी पूर्ण झाली आहे. १५ वर्षांच्या प्रदीर्घ कालावधीनंतर, महाराष्ट्र राज्य बास्केटबॉल असोसिएशन (MSBA) बास्केटबॉल फेडरेशन ऑफ इंडिया (BFI) च्या मार्गदर्शनाखाली या युथ (अनुक्रमे १६ वर्षांखालील) राष्ट्रीय स्पर्धेचे आयोजन करत आहे. सिंधुदुर्ग बास्केटबॉल असोसिएशनचे सचिव अजय शिंदे यांनी याबाबत माहिती दिली आहे. 

महाराष्ट्राचे मुख्यमंत्री देवेंद्रजी फडणवीस मंगळवारी संध्याकाळी ६ वाजता या चॅम्पियनशिपचे उद्घाटन करतील. या प्रसंगी बीएफआय (BFI) चे अध्यक्ष आणि तामिळनाडूचे क्रीडा मंत्री आधाव अर्जुन, केंद्रीय राज्यमंत्री आणि एमओए (MOA) चे अध्यक्ष मुरलीधर मोहोळ, एमएसबीए (MSBA) चे अध्यक्ष संदीप जोशी, बीएफआयचे सचिव कुलविंदर गिल, एमएसबीएचे सचिव गोविंद मुथुकुमार, संकेत चोंधे आणि ललित नहाटा हे व्यासपीठावर उपस्थित राहतील. खेळाडूंचे आणि बीएफआय अधिकाऱ्यांचे स्वागत करताना एमएसबीएचे अध्यक्ष आणि महाराष्ट्र ऑलिम्पिक असोसिएशनचे (MOA) वरिष्ठ उपाध्यक्ष संदीप जोशी म्हणाले की खूप मोठ्या कालावधीनंतर बीएफआयने महाराष्ट्राला राष्ट्रीय चॅम्पियनशिपचे यजमानपद भूषवण्याची संधी दिली आहे. ही राष्ट्रीय स्पर्धा प्रचंड यशस्वी करण्यासाठी एमएसबीएचे सर्व सदस्य सज्ज झाले आहेत. मी देशभरातून आलेल्या सर्व खेळाडूंचे स्वागत करतो. आमचे महाराष्ट्राचे संघ स्पर्धेसाठी पूर्णपणे तयार असून आम्हाला पोडियम फिनिश (पदक मिळवण्याचा) पूर्ण विश्वास आहे. महाराष्ट्र आपल्या आदरातिथ्यासाठी ओळखला जातो आणि आम्ही एक उत्तम यजमान असल्याचे सिद्ध करू. या आठ दिवसीय राष्ट्रीय स्पर्धेत २८ मुलांचे आणि २६ मुलींचे असे एकूण ५४ राज्यांचे संघ सहभागी होणार असून, या स्पर्धेचा समारोप ३ नोव्हेंबर रोजी बालेवाडी येथील इनडोअर स्टेडियमवर होईल.

या 'लीग-कम-नॉकाऊट' चॅम्पियनशिपमध्ये एकूण १४४ सामने खेळवले जातील, ज्यातून भारतीय बास्केटबॉलचे भविष्य असणाऱ्या गुणवान खेळाडूंची निवड केली जाईल.

चोंधे पाटील स्पोर्ट्स कॉम्प्लेक्सच्या दोन बास्केटबॉल कोर्टव्यतिरिक्त, काही सामने विद्या व्हॅली स्कूल, पुणे येथेही खेळवले जातील. सकाळच्या आणि संध्याकाळच्या सत्रात एकूण चार बास्केटबॉल कोर्टवर सर्व सामने एकाच वेळी खेळवले जातील.