नेरूर येथे पार पडले या अनोख्या उपक्रमाचे सुरेख चित्रिकरण..

लवकरचं येत आहे रसिक प्रेक्षकांच्या भेटीला..

नेरूर । देवेंद्र गावडे
शनिवार । २३ जुलै २०२२

गेल्या अनेक वर्षांपासून उत्सवांचे रूपांतर हे इव्हेंटमध्ये झालेलं आपल्याला पहायला मिळते. खरतर कुठलाही उत्सव साजरा करताना त्यातील आनंद वाटून घेऊन आपल्याला एक सामाजिक भान राखून आपण एक मनुष्य म्हणून कसे परिपूर्ण आहोत हे सांगण्यासाठी आणि ते एकमेकांना जाणवून देण्यासाठी खरतर हे उत्सव साजरे केले जातात. परंतु गेल्या अनेक वर्षांमध्ये ह्या इव्हेंटच्या रूपांतराने आपल्यातला असणाऱ्या माणूसपणाचा, लोकसंस्कृतीचा आणि महाराष्ट्रातील लोकपरंपरेचा आपल्याला विसर पडत चालला आहे. हा विसर पडू नये व पुन्हा एकदा आपली लोकसंस्कृती, लोककलांचे अस्तित्व टिकवण्यासाठी हे प्रयत्न सुरू आहेत.

कोकणातील दशावतार, जव्हार-मोखाडा मधील वारली, दोडामार्ग मधील चपई, पिंगुळी येथील ठाकर समाजातील चित्रकथी-कळसूत्री, घाटमाथ्यावरील तमाशा किंवा विदर्भातील झाडीपट्टी अशा विविध लोककलावंतांना एकाछताखाली आणून आपल्या सर्व विघ्नांना हरण करण्यासाठी विघ्नहर्ता श्री गणपतीला एक साकडं घातलं जात आहे. बाप्पा आम्हाला तारायला ये आणि या सगळ्यातून लोककलेचा विकास आणि लोककलेची समृद्धी होऊ दे. यासाठी हा घाट यंदाच्या गणेश उत्सवाच्या निमित्ताने घातला आहे.

लोकपरंपरा या महाराष्ट्राच्या लोकसंस्कृतीची एक शान आहे. त्याच प्रमाणे त्यातून होणारे प्रबोधन हे खरंतर आपल्या समाजासाठी आणि आपल्या निसर्ग संवर्धनासाठी अतिशय महत्वाचे आहे असं सांगणार भारुड, शाहिरी, कीर्तन या अशा प्रकारच्या लोककलेतून गणपती बाप्पाचे दर्शन आपल्याला होणार आहे. अशा विविध लोककला प्रकारांसाठी महाराष्ट्राची ओळख कायम टिकावी आणि निसर्गाचं कायम जतन व्हावं यासाठी कुडाळमधील नेरूर या गावात याच चित्रीकरण होत आहे.

ही मूळ संकल्पना आणि निर्मिती डॉ. सुमित पाटील यांची आहे. मुंबई विद्यापीठाचे लोककला विभागाचे प्रमुख श्री. गणेश चंदनशिवे यांनी हे गाणं स्वतः संगीतबद्ध करून आपल्या सुमधुर आवाजात गायलं आहे. या संकल्पनेचे लेखन डॉ. प्रणव प्रभू यांनी केले आहे. या गाण्याचे चित्रीकरण आघडीचे छायाचित्रकार पराग सावंत आणि मिलिंद आडेलकर करीत आहेत. या गाण्यात पद्मश्री पुरस्कार पुरस्कार प्राप्त लोककलावंत श्री. परशुराम गंगावणे, सिद्धेश नेरुरकर, किशोर नाईक, शनी सोनावणे, प्रवीण बर्वेकर, संकेत जाधव, विजय वालावलकर, सुवर्णा वायंगणकर, संदेश कदम, शिवहरी रानडे, शाम तेंडुलकर, विठ्ठल तळवलकर आणि निलेश गुरव त्याचप्रमाणे महाराष्ट्रातील वेगवेगळ्या भागातील लोककलावंत या उपक्रमात सहभागी असणार आहेत. या उपक्रमातून निसर्ग आणि लोककला संवर्धनाचा संदेश देण्यात येणार आहे.