वाढत्या अपघातांनंतर ग्रामस्थांची मागणी.

चौके | अमोल गोसावी : सिंधुदुर्ग जिल्ह्यातील ‘मालवण नेरुरपार कुडाळ’ या मार्गावर धामापूर ते नेरुरपार दरम्यानच्या रस्त्यावर भरधाव वाहनांमधील अपघातांची संख्या वाढल्यामुळे काळसे धामापूर मधील ग्रामस्थांनी वाहनांच्या जीवघेण्या वेगाला आवर घालण्याची इच्छा व्यक्त केली होती.

ग्रामस्थांच्या या मागणीचा पाठपुरावा म्हणून पेंडूर विभागातील शिवसेना पदाधिकारी आणि शिवसैनिकांनी काळसे गावात श्री. शिवाजी विद्यामंदिर काळसे आणि , जि. प. प्राथमिक शाळा न. १ येथे गतिरोधक घालण्यासाठी सार्वजनिक बांधकाम उपविभाग मालवणचे कनिष्ठ अभियंता नितिन दाणे यांना निवेदन दिले.
यावेळी पेंडूर शिवसेना विभागप्रमुख अण्णा गुराम , पंचायत समिती सदस्य कमलाकर गावडे, बाळ महाभोज , बाबू टेंबुलकर , विष्णू लाड , आणि शिवसेना पदाधिकारी उपस्थित होते.
मालवण – कुडाळ मुख्य रस्त्यावर धामापूर ते नेरुरपार दरम्यानच्या रस्त्याच्याकडेला मोठी लोकवस्ती आहे तसेच प्राथमिक शाळा आणि काळसे हायस्कूलही रस्त्याकडेलाच आहे. या मार्गावरून चिरे, वाळू वाहतूक करणारे अनेक डंपर तसेच गोवा येथून मालवणच्या दिशेने पर्यटकांना घेउन जाण्याऱ्या मिनीबस आणि टेंपो ट्रॅव्हलर भरधाव वेगाने ये जा करतात. अशावेळी रस्त्याकडेला शाळा असल्याने विद्यार्थीही रस्त्यावर प्रवास करत असतात. भरधाव वाहनांमुळे मुलांच्या जिवीतास धोका पोहोचू शकतो त्यामुळे अनेक पालक आणि जागरूक ग्रामस्थांनी वारंवार धामापूर भगवती मंदिर ते नेरुरपार होबळीचा माळ या परिसरात सार्वजनिक बांधकाम विभागाने किमान चार ठिकाणी तरी गतिरोधक घालावे अशी मागणी केली होती. या मागणीला अनुसरूनच शिवसैनिकांनी सार्वजनिक बांधकाम विभागास गतिरोधक उभारणीसाठी लेखी निवेदन दिले आहे.