मासेमार नौकाधारकांना डिझेल प्रतिपूर्ती अनुदान मंजूर.
जिल्ह्यातील ३०० नौका मालकांना मिळणार लाभ.
सिंधुदुर्गनगरी | ब्यूरो न्यूज : महाराष्ट्र शासनाने मासेमार नौकाधारकांसाठी डिझेल प्रतिपूर्ती योजना कार्यन्वित केलेली आहे. यामध्ये नौकाधारकांनी मच्छिमारीसाठी वापरलेल्या डिझेल वरील मूल्यवर्धित कर परतावा देण्यात येतो. १९ जूनच्या आदेशानुसार सिंधुदुर्ग जिल्ह्यातील १० मत्स्य सहकारी संस्थांच्या नौका मालकांना २ कोटी ३६ लाख १७ हजार ५५० एवढी रक्कम मंजूर करण्यात आली आहे.
ही रक्कम २३ जून २०२५ रोजी पासून जिल्ह्यातील एकूण ३०० नौका मालकांच्या खाती VPDA प्रणाली अंतर्गत ऑनलाईन पद्धतीने जमा करण्यात येत आहे. मे २०२५ अखेर सिंधुदुर्ग जिल्ह्यातील मासेमार नौका धारक यांचा रु. ४ कोटी ३६ लाख ५ हजार ८१५ एवढा डिझेल परतावा प्रलंबित होता. प्रलंबित रक्कम लवकरात लवकर मंजूर करण्यात येणार असल्याचे मत्स्यव्यवसाय विभागाने कळविले आहे.
पावसाळी मासेमारी बंदी कालावधीत मासेमारी बंद असताना सदर परतावा अनुदान रक्कम मंजूर केल्याने मासेमार नौकाधाराकांनी शासनाचे आभार मानून समाधान व्यक्त केले आहे.
विभाग:
(आपल्या वेबपोर्टल वरील बातम्या, माहिती, लेखन, छायाचित्रे, जाहीराती व संबंधित मजकूर आणि इतर घटकांच्या विश्वासार्हतेची जबाबदारी आपली सिंधुनगरी न्यूज चॅनेल, प्रतिनिधी, संपादन विभाग तसेच आपली सिंधुनगरी न्यूज चॅनेलची नाही, याची कृपया नोंद घ्यावी.)
