मसुरे | प्रतिनिधी : सेवानिवृत्त ग्रामसेवक संवर्ग महासंघाची सावंतवाडी, दोडामार्ग तालुक्याची एकत्र बैठक सावंतवाडी येथील ज्येष्ठ नागरिक संघाच्या सभागृहात प्रकाश राणे यांच्या अध्यक्षतेखाली झाली. या बैठकीत झालेल्या चर्चेत सेवानिवृत्त ग्रामसेवक व ग्रामविकास अधिकाऱ्यांचे विविध प्रश्न प्रलंबित असल्याचे समोर आले. हे प्रश्न मार्गी लावण्यासाठी सेवानिवृत्त ग्रामसेवक संवर्गाच्या जिल्हा कार्यकारिणीने संबंधित अधिकाऱ्यांशी चर्चा करावी. दिलेल्या मुदतीत प्रशासनाकडून प्रश्न न सुटल्यास आंदोलन छेडण्यात येईल, असा इशारा बैठकीत देण्यात आल्याची माहिती संघटनेचे जिल्हा उपाध्यक्ष हनुमंत प्रभू यांनी दिली. जिल्हा उपाध्यक्ष हनुमंत प्रभू, सचिव प्रकाश राणे, मधुकर घाडी, संतोष जाधव, एस. बी. पेडणेकर, रामा ठाकुर, एन. यू, राऊळ, व्ही. आर. राऊळ, ए. आर. वारंग, विष्णू चराटकर, सत्यविजय सावंत, आर. आर. सावंत, नारायण धुरी, मनोहर वेंगुर्लेकर, विष्णू थुरी, प्रमोद तोरसकर, गोकुळदास शिरसाट, -संदीप बांदेकर, रामचंद्र कोचरेकर, एस. एस. मोरे आदी सेवानिवृत्त ग्रामसेवक, ग्रामविकास अधिकारी उपस्थित होते.

महासंघ सिंधुदुर्गला धर्मादाय आयुक्तांची अधिकृत नोंदणी मिळाल्याने संघटना अधिकृत झाली. त्यामुळे सभासदांनी आनंद व्यक्त केला. सेवानिवृत्त सर्व ग्रामसेवक व ग्रामविकास अधिकारी यांची नोंदणी करून घेण्यात यावी, असे ठरले. दोडामार्ग, सावंतवाडी तालुक्यातील सेवानिवृत्त ग्रामसेवकांचे प्रश्न प्रलंबित असल्याचे समोर आले. पेन्शन उशिरा जमा होणे, आश्वासित योजनेची प्रकरणे प्रलंबित ठेवणे, रजा रोखीकरण, आदर्श ग्रामसेवक वेतन वाढ, १५ वर्षानंतर पूर्ण पेन्शन न मिळणे, ८० वर्षानंतर २० टक्के पेन्शन वाढ, सेवापुस्तके गहाळ होणे, पेन्शनरांच्या पश्चात त्यांच्या अविवाहित वा अपंग मुलींना पेन्शन न मिळणे, बक्षीस समितीनुसार विस्तार अधिकारी पदाची वेतनश्रेणी ग्रामविकास अधिकारी यांना लागू न करणे आदी प्रकरणे प्रलंबित आहेत. ग्रामविकास अधिकारी बांदेकर यांची पेन्शन केस प्रलंबित असून नियमित पेन्शन मिळत नसल्याचे सांगण्यात आले. जिल्हा कार्यकारिणीने संबंधित अधिकाऱ्यांना भेटून चर्चा करून प्रश्न मार्गी लावण्यासाठी प्रयत्न करावेत असे ठरविण्यात आले.