जबर जखमी बाबल्या पवार यांच्या आर्थिक मदतीसाठी प्रयत्नशील असल्याची अधिकार्यांची माहिती .

शिरगांव | संतोष साळसकर : देवगड तालुक्यातील शिरगांव – साळशी मार्गावरील चौकेवाडी फाट्या नजीकच्या वळणावर काल गुरुवारी रात्री साडेआठ च्या सुमारास एका दुचाकीस्वाराला एका गवा रेड्याने अचानक हल्ला केल्याने ते गंभीररीत्या जखमी झाले. त्यांना पुढील अधिक उपचारासाठी कणकवलीतील खाजगी रुग्णालयात हलविण्यात आले. याची दखल संबधित वनविभागाने तत्काळ घेऊन घटनास्थळी जाऊन आज २९ मार्चला संध्याकाळी ४ वाजता रीतसर पंचनामा केला.

जखमी श्री बाबल्या पवार.

काल गुरुवारी साळशी येथील बाबल्या गणपत पवार हे आपल्या मोटारसायकल ने कामानिमित्त शिरगांव ला गेले होते. ते संध्याकाळी घरी साळशी येथे जात असताना रात्री ८.४५ वाजण्याच्या सुमारास एका गवा रेड्याने त्यांच्यावर अचानक हल्ला केला. यात ते गंभीररीत्या जखमी झाल्याने त्यांना अधिक उपचाराकरिता कणकवली येथील खाजगी रुग्णालयात हलविण्यात आले. त्यांना सुरवातीला शिरगांव येथील सरकारी दवाखान्यात नेण्यात आले होते. त्यांच्या शरीराची उजवी बाजू खूपच कमकुवत झाल्याने त्यांना नीट बोलताही येत नाही. डोक्याला पण मार लागला आहे. बाबल्या पवार यांची आर्थिक परिस्थिती खूपच बिकट आहे.ते मोलमजुरी करून आपला कुटुंब सांभाळीत आहेत. त्यांना यावेळी आर्थिक मदतीची खरी गरज आहे. अशी मागणी होत आहे.

पंचनामा करतेवेळी देवगड वनधिकारी सारीक फकीर, वनरक्षक रामदास घुगे, वनक्षेत्रपाल कणकवली चे राजेंद्र घुणकीकर, सामाजिक वनीकरण च्या वनपाल आशा शिंदे, शिरगांव पोलीस पाटील चंद्रशेखर साटम, सत्यवान पवार आदी उपस्थित होते. यावेळी बोलताना वनधिकारी सारीक फकीर यांनी जखमी बाबल्या पवार यांना शासनाकडून आर्थिक मदत मिळवून देण्यासाठी प्रयत्नशील असल्याची माहिती दिली.