संतोष साळसकर | शिरगांव : देवगड तालुक्यातील चाफेड ग्रामपंचायतीच्या निवडणुकीत गाव पॅनल पुरस्कृत सरपंच पदी किरण लीलाधर मेस्त्री यांची बिनविरोध निवड झाली आहे. तर उपसरपंच पदाच्या निवडणुकीत महेश बाळाराम राणे यांची निवड झाली आहे चाफेड ग्रामपंचायतीच्या निवडणुकीत सरपंच सहित सर्व सदस्यांची बिनविरोध निवड झाली आहे. बिनविरोध सदस्य अनुक्रमे – सौ. सान्वी संजय मेस्त्री, सौ. राधिका राकेश ठूकरुल, सौ प्रतिभा प्रकाश मेस्त्री, सुदर्शन आकाराम साळकर, सौ. मानशी महेश परब, सुनील गोपाळ कांडर हे बिनविरोध निवडून आले. मात्र उपसरपंच पदाच्या निवडणुकीसाठी महेश बाळाराम राणे आणि सुनील गोपाळ कांडर यांनी आपले उमेदवारी अर्ज दाखल केल्याने गुप्त पद्धतीने मतदान घेण्यात आले. यात महेश राणे यांना ६ मते तर सुनील कांडर यांना २ मते मिळाल्याने महेश राणे हे विजयी झाले.

यावेळी निवडणूक निरीक्षक म्हणून एस.पी. गायकवाड, अध्यासी अधिकारी म्हणून ग्रामसेवक एम. जी. जळते यांनी काम पाहिले. यावेळी मावळते सरपंच सौ. संचिता भोगले यांनी नूतन सरपंच किरण मेस्त्री, उपसरपंच महेश राणे यांचे पुष्पगुच्छ देऊन अभिनंदन केले. तर इतर सर्व सदस्यांचे ही यावेळी पुष्पगुच्छ देऊन अभिनंदन करण्यात आले.

याप्रसंगी माजी सरपंच सौ. संचीता भोगले, तंटामुक्त समिती अध्यक्ष दिलीप पाटील, शाळा व्यवस्थापन समिती अध्यक्ष सचिन मोंडकर, माजी सरपंच संतोष साळसकर, सत्यवान कांडर, पंढरीनाथ कांडर आदींसह ग्रामस्थ उपस्थित होते.