गणेशोत्सव सण जवळ आल्याने तात्काळ एस्. टी सेवा सुरू करावी अशी ग्रामस्थांची मागणी .

शिरगांव | संतोष साळसकर :
देवगड तालुक्यातील चाफेड गावठण मार्गे भोगलेवाडी पर्यंतच्या मार्गावर मोठमोठे खड्डे पडल्याने गेले चार दिवस या मार्गावरची एस्. टी वाहतूक बंद झाल्याने सद्या ग्रामस्थांचे अतोनात हाल होत आहेत. याबाबत ग्रामस्थांनी एकत्रित येऊन हे खड्डे बुजविले.
गेली अनेक वर्षे चाफेड गावठणवासियांतर्फ श्रमदान केले जाते. या मार्गावर पूर्णतः डांबरीकरण व्हावे अशी येथील ग्रामस्थांनी एकमुखी मागणी होती. मात्र या मार्गावर काही अंतरावर कमी प्रमाणात डांबरीकरण होते आणि पुढच्या वर्षी ते पावसाळ्यात धुपून जाते. सद्या या मार्गावर खड्ड्यांचे साम्राज्य पसरले आहे.
अवघ्या महिनाभरात गणपती बाप्पांचे आगमन होणार असून या गणेशोत्सवात एस्. टी वाहतूक सुरळीतपणे चालू रहावी यासाठी ग्रामस्थांनी एकत्रित येऊन श्रमदानाने खड्डे बुजविले. संबधित खाते किंवा कोणीही लोकप्रतिनिधी याकडे लक्ष देत नसल्यामुळे ग्रामस्थांमध्ये तीव्र नाराजीचे सुर उमटत आहेत.
दरम्यान भाजपचे जिल्हा कार्यकारणी सदस्य संदीप साटम आणि माजी जि. प. सदस्य सुभाष नार्वेकर यांनी बोलताना सांगितले की पुढच्या वर्षी हा संपूर्ण रस्ता मुख्यमंत्री ग्रामसडक योजनेंतर्गत घेण्यात येणार असून तसे आमचे पर्यंत देखील चालू आहेत. असे सांगितले.मात्र सद्या येथील ग्रामस्थांना एस्. टी बंद झाल्याने अनेक गैरसोयींना सामोरे जावे लागत आहे. सद्या ग्रामस्थांना शिरगांव येथील आठवडी बाजाराला जाण्यासाठी सुमारे ५ कि. मी. अंतर पायी चालत साळशी ला जावे लागत आहे.त्यामुळे शालेय विद्यार्थी,वयोवृद्ध व्यक्ती, लहान मुले यांना मानसिक आणि शारीरिक त्रास सहन करावा लागत आहे. गणेशोत्सव काळात तर बाजार रहाट आणण्यासाठी ग्रामस्थांना अक्षरशः मानसिक त्रास सहन करावा लागणार आहे. तरी या मार्गावरील ग्रामस्थांनी खड्डे बुजविल्याने आता तरी एस्. टी महामंडळाने एस्. टी सेवा सुरू करावी अशी आग्रही मागणी होत आहे.
या श्रमदानाला ग्रा. प. सदस्य महेश राणे, माजी तंटामुक्ती समिती अध्यक्ष प्रवीण राणे,शाखाप्रमुख उदय राणे,प्रकाश मोंडकर,सचिन मोंडकर,प्रदीप घाडी,अनंत घाडी,चंद्रकांत मोंडकर,हर्षद राणे,उमेश राणे आदींसह महिला वर्ग मोठ्या संख्येने सहभागी झाले होते .