साळशी गांवच्या हर्षालीचा शैक्षणिक यशाचा हर्षोत्सव…!

शिरगांव | संतोष साळसकर (विशेष) : हर्षोत्सव हा आखता येत नाही तर तो घडतो. शैक्षणिक प्रणाली आणि यश याचा विचार करता तर तो ‘जडण घडण’ या प्रक्रियेमधून ..थोड्या घर्षणाने व बाह्यकारकांचा सामना करत करत घडत असतो. तो हर्षोत्सवच असतो पण त्यामागे ‘प्रतिकूल ते अनुकूल’ असे अनेक टाकिचे घाव असतात.

देवगड तालुक्यातील साळशी गावची कु.हर्षाली अनिल पवार हिनेही नुकताच एक हर्षोत्सव साजरा केलाय.

हर्षालीची घरची आर्थिक परिस्थिती अगदी बेताची..आई गृहिणी..तर वडील गवंडी काम करून घरसंसार चालवितात.मोठा भाऊ अजूनही पुढील शिक्षण घेत आहे.याही परिस्थितीमध्ये हर्षाली हिने खूप मेहनत आणि जिद्द- चिकाटीच्या जोरावर यश मिळवत १० वी च्या परीक्षेत (८८.६० टक्के ) गुण मिळवत हायस्कूल मधे द्वितीय येण्याचा बहुमान मिळविला.तिला याकामी आईवडिलांचे खूप प्रोत्साहन,सहकार्य मिळाले.
यश व अपयशापार कष्टाच्या आईबापपणाला वरील टक्क्यांची मानवंदना देताना तिच्या चेहऱ्यावर ‘हर्षोत्सव’ अगदी खुलून दिसत होता.
कु.हर्षाली अनिल पवार साळशी येथील मध्यामिक विद्यामंदिर ची ही विद्यार्थिनी आहे. तिला लहानपणापासून वकृत्व कलेची खूप आवड. तिची बुध्दीमत्ता लक्षणीय आणि चाणाक्ष असे तिचे गुरुजन पहिल्यापासूनच सांगतात. इयत्ता ९ वी मध्ये ऑनलाईन कथावाचन स्पर्धेत तिसरा क्रमांक आला तर वर्गात प्रथम क्रमांक आला. १० वी. मध्ये वकृत्व स्पर्धेत केंद्रस्तरीय प्रथम क्रमांक तर प्रभागस्तरिय द्वितीय क्रमांक आला.देवगड तालुकास्तरीय ४५ व्या विज्ञान प्रदर्शन व वकृत्व स्पर्धेत “स्वच्छ्ता व आरोग्य ” या विषयावर तिसरा क्रमांक मिळाला. बॅ. नाथ पै. सेवांगण – मालवण यांच्या कथावाचन स्पर्धेत तृतीय क्रमांक मिळविला. माझे कुटुंब माझी जबाबदारी” या ऑनलाईन वकृत्व स्पर्धेत तिला द्वितीय क्रमांक मिळाला.स्वातंत्र्याचा अमृतमहोत्सव अंतर्गत घेण्यात आलेल्या वकृत्व स्पर्धेत प्रथम क्रमांक मिळाला. इ. ६वी. मध्ये तिला गणित आणि इंग्रजी या विषयात प्रथम आल्याबद्दल तिला रोख बक्षिसेही मिळाली होती. केंद्रस्तरीय ज्ञानी मी होणार स्पर्धेत यश मिळविल्याबद्दल अनेक संस्थांच्यावतीने तिला प्रशस्तीपत्रक देऊन सत्कार करण्यात आला. लांब उडी आणि गोळाफेक या क्रीडा स्पर्धेत प्रथम,द्वितीय क्रमांक तिला मिळाले.या तिच्या यशात संस्था चेअरमन सत्यवान सावंत, मुख्याध्यापक माणिक वंजारे,वर्गशिक्षक पुरुषोत्तम साटम यांचे मोठे मार्गदर्शन लाभले. तर आईवडिलांचे सहकार्य,प्रोत्साहन, मार्गदर्शन ही मिळाल्याचे हर्षाली आनंदाने सांगते.
भविष्यात हर्षाली हिला १२ वी मध्ये विज्ञान शाखेत प्रवेश घ्यायचा आहे. नंतर तिला शिक्षिका किव्हा नर्सिंग मधे करियर करून समाजाची सेवा करायची आहे. हर्षालीला उत्तम प्रकारे शिवणकला ही अवगत आहे. आज ती या लहान वयात उत्तमप्रकारे महिलांचे कपडे शिवते.अभ्यासात हुशार..न मनमिळाऊ स्वभाव… आईवडिलांच्या कष्टाची जाण.. अतिशय प्रतिकूल परिस्थितीमध्ये शिक्षण घेतले…या सर्वांची जाण हर्षालीला आहे. म्हणूनच हर्षाली सांगते की मी माझे शिक्षण पूर्ण करून मला शिक्षिका किव्हा नर्सिंग करून मेडिकल ला जायचे आहे. मला समाजातील दीन दुबळ्या लोकांसाठी सेवा करायची आहे.

हर्षोत्सवाची पहिली मोठी पायरी हर्षालीने गाठली आहे आणि आपल्यासोबत अनेकांना तो हर्षोत्सव साजरा करायची संधी व प्रेरणा दिली आहे.
हर्षजन्म शोधणे हेच मानवजातीचे काम आहे असे म्हणतात आणि त्याच कामाला तिला भविष्यासाठी अनेक स्तरातून शुभेच्छा मिळतायत आणि म्हणतायत,”हर्षाली हर्षोत्सव साजरा करत रहा…हा हर्षजन्म शोधताना!”