जागोजागी खड्ड्यांचे साम्राज्य..!

शिरगाव | संतोष साळसकर :

देवगड तालुक्यातील प्रमुख जिल्हा मार्ग क्र. ९ खारेपाटण वेळगीवे-शेवरे-शिरगाव-साळशी-कुवळे रस्त्यावरील शिरगाव-साळशी रस्ता येथील नुतनीकरणाचे काम मंजूरी अभावी रेंगाळले आहे.

हा मार्ग देवगड, कणकवली, मालवण असे तीन तालुके जोडणारा असून अधिक महत्वाचा आहे.

बारमाही सतत वाहतूकीची वर्दळ असते. पर्यटनदृष्टया पर्यटन स्थळांना भेटी दिल्या जाताना वाहनधारकांना अत्यंत सोयीचा ठरणारा आहे.

अंतर कमी झाल्याने प्रवाशांची वेळ व इंधन दोन्हीची बचत होते. यामुळे प्रवासी रस्त्याने प्रवास करण्याला जास्त पसंती देतात.

खासगी वाहनधारक तसेच सार्वजनिक ए.स.टी. वाहतुक मोठया प्रमाणावर चालू असते.

परंतू पहिल्या पावसात सुरवातीलाच शिरगाव-साळशी रस्त्यावर खड्डे पडले आहेत. गटारे बुजलेली आहेत. झाडी वाढलेली आहे. यामुळे वाहतूकीमध्ये असुरक्षितता निर्माण झाली आहे.

या रस्त्यावरील समस्या सोडविण्यासाठी दि.२५ डिसेंबर २०२१ रोजी साळशी ग्रामपंचायत कार्यालय येथे ग्रामस्थांनी उपोषण केले होते. त्यावेळी सार्वजनिक बांधकाम विभागाकडून लेखी आश्वासन दिले गेले होते.

त्याची पुढे कार्यवाही झालेली नाही. त्यामुळे ग्रामस्थांमधे नाराजी व्यक्त केली जात आहे.
आता पावसाळ्यात या रस्त्यावरील अडचणी अधिक वाढल्याने वाहतुक करताना कसरत करावी लागत आहे.

संबधित विभागाने याकडे लक्ष देवून त्वरीत देखभाल दुरूस्ती करावी अशी मागणी जनतेकडून करण्यात येत आहे.