शिरगांव |संतोष साळसकर : देवगड तालुक्यातील शिरगांवचा आज बाजाराचा दिवस असल्याने ग्राहकांची मोठी गर्दी होती.येथील बँक ऑफ इंडिया जवळ एका ग्राहकाच्या मोटरसायकल मध्ये साप दडून बसल्याचे कळताच सर्वांची एकच धावपळ सुरू झाली.कुणीच त्या मोटारसायकल जवळ जाण्यास तयार होईना.त्या सापाला बाहेर काढण्यासाठी जो तो आपापल्या परीने प्रयत्न करीत होता.अखेर एक तासाच्या या प्रयत्नानंतर अखेर शिरगांव येथील सर्पमित्र विक्रम विलासराव ऐनापुरे यांना बोलविण्यात आले.त्यानंतर विक्रम ऐनापुरे यांनी मोटारसायकलची सीट उघडल्यानंतर त्यांना “मण्यार”जातीचा विषारी साप आत दडून बसला असल्याचे समजले. त्याला त्यांनी बाहेर काढण्यात यश मिळविले,पण मण्यार जातीचा साप हा खूप चपळ असतो.त्यामुळे त्याला पकडण्या अगोदरच त्याने बाजूच्या बिळात प्रवेश केला.आणि सर्वांनी सुटकेचा निःश्वास घेतला.येथील सर्पमित्र विक्रम ऐनापुरे यांनी यापूर्वी अनेक मोठमोठे विषारी साप पकडून त्यांना जंगलात सुखरूप सोडले आहेत.काहींच्या घरात अडगळीत दडून बसलेल्या मोठ्या विषारी सापांनाही त्यांनी पकडून जंगलात सोडून जीवदान दिले आहे. जिल्ह्यात वीस वर्षांपूर्वी “एका सिबीझी मोटारसायकलमध्ये साप असल्याची” बातमी पसरली होती…त्याची पुष्टी मात्र नीटशी झाली नव्हती परंतु शिरगांवमधील हा मण्यार मोटारसायकलमध्ये असल्याचे प्रत्यक्षदर्शींनी फोटोद्वारा दाखवून दिले आहे.