कणकवली| ब्यूरो न्यूज : कणकवली शहरानजीक नागवे हद्दीत असलेल्या रेल्वे रुळावर दुपारी १२:३० वाजता (१०१०४) मुंबईच्या दिशेने जाणारी मांडवी एक्सप्रेस ही नागवे हद्दीत रेल्वे रुळावर आल्यावर निशिकांत भास्कर जाधव (वय ३९, रा. शिरगाव बौद्धवाडी) हे रेल्वे रुळाच्या बाजूला बसलेल्या स्थितीत मांडवी एक्सप्रेस च्या लोको पायलटला दिसले. रेल्वे जशी जवळ आली तशी निशिकांत भास्कर जाधव यांनी रुळावर झोकून दिले असल्याची माहिती मांडवी एक्सप्रेस चे लोकोपायलट यांनी दिली असल्याची माहिती रेल्वे पोलीस कॉन्स्टेबल एच. पी. शिंदे यांनी दिली. अपघातानंतर मांडवी एक्सप्रेस तब्बल १२ मिनिटे घटनास्थळाच्या पुढे थांबली होती, असेही श्री. शिंदे म्हणाले.

घटनेची माहिती मिळताच रेल्वे पोलीस कॉन्स्टेबल एच. पी. शिंदे, पोलीस उपनिरीक्षक ज्ञानेश सावंत, पोलीस हवालदार विनोद सुपल, होमगार्ड अनिकेत राणे, महेश पाटील, घटनास्थळी दाखल झाले. निशिकांत जाधव यांचा मृतदेह नागवे येथील रेल्वे रुळावर मुंबईच्या दिशेने जाणाऱ्या ट्रॅक्टरच्या डाव्या बाजूला पडला होता. घटनेची माहिती मिळताच नातेवाईक घटनास्थळी दाखल झाले. मृतदेहाचा पंचनामा करून झाल्यावर कणकवली उप जिल्हा रुग्णालयात आणण्यात आला होता. घटनेचा पुढील तपास सुरु असल्याचे सूत्रांकडून समजते आहे.