मालवण | सुयोग पंडित : सिंधुदुर्ग जिल्ह्यातील क्रीडा वर्तुळात विशेष सन्मानाची असलेल्या कोरगांवकर्स मालवण टेबल टेनीस ॲकॅडमीने आज ११ मे रोजी ११ व्या वर्षात पदार्पण केले आहे. ११ मे २०१४ रोजी स्थापन झालेल्या मालवण टेबल टेनिस अकॅडमी ने १० वर्षांचा कालखंड पूर्ण करताना टेबल टेनिस खेळाचा प्रसार आणि प्रचार करण्याच्या मुख्य उद्देश परिणामकारक पणे साधला असल्याची प्रतिक्रिया क्रीडा प्रेमी व क्रीडा तज्ञ यांनी व्यक्त केली आहे.

या १० वर्षांच्या क्रीडा प्रवासात ॲकॅडमीने जिल्हा, विभाग आणि राज्य स्तरावर चमकदार कामगिरी करणारे टेबल टेनिस पटू तयार केले. खेळाडुंना वैयक्तिक मार्गदर्शन, अत्याधुनिक रोबोटिक सयंत्राद्वारे प्रशिक्षण, टेबल टेनिस खेळातील प्राविण्यासह मनाच्या एकाग्रतेमध्ये वाढ करुन त्यासोबत खेळाडुंचा व्यक्तिमत्त्व विकास देखील ॲकॅडमीने साध्य केला आहे.

कोरगांवकर्स मालवण टेबल टेनीस ॲकॅडमीचे सर्वेसर्वा विष्णू कोरगांवकर यांच्या या वाटचालीबद्दल त्यांनी ॲकॅडमीचे संपूर्ण श्रेय तमाम मालवणवासीय , क्रीडा प्रेमी, प्रशिक्षणार्थी मुले,त्यांचे पालक यांचा पाठिंबा, सदिच्छा आणि सहकार्य यांना दिले आहे. टेबल टेनीस किंवा कुठलाही खेळ हा खिलाडूवृत्ती ने खेळायला हवा यासाठी मुलांमध्ये खिलाडूवृत्तीची जोपासना व्हावी म्हणून विशेष लक्ष दिला जाते असेही त्यांनी विशेष नमूद केले आहे.

महासिंधु टेबल टेनीस असोसिएशनचे सचिव हेमंत वालकर आणि सिंधुदुर्ग जिल्ह्यातील अनेक मान्यवर, क्रीडा प्रेमी, पालक, खेळाडू यांनी अभिनंदन करुन कोरगांवकर्स टेबल टेनीस ॲकॅडमीच्या पुढील वाटचालीसाठी सदिच्छा दिल्या आहेत.