शिरगांव राक्षसघाटीत गवा रेड्याच्या हल्ल्यात कारचे प्रचंड नुकसान ; शनिवारची घटना.
ग्रामस्थ आणि शेतकरी वर्गातही भीतीचे वातावरण.
शिरगांव | संतोष साळसकर : सिंधुदुर्ग जिल्ह्यातील
देवगड – नांदगाव रस्त्यावर शिरगांव राक्षसघाटी येथे गव्याने प्रकाश गोगटे यांच्या कारवर केलेल्या हल्ल्यात कारचे मोठ्या प्रमाणात नुकसान झाले. ही घटना शनिवारी सायंकाळी ७:३० च्या दरम्यान घडली. प्रकाश गोगटे यांच्या मालकीची (एम. एच. ०७, ए. बी. २१९२) ही चारचाकी त्यांचे चालक सुहास तांबे हे कणकवलीहून जामसंडेकडे घेऊन जात होते. सायंकाळी ७:३० च्या सुमारास ते राक्षसघाटी येथे आले असता त्यांच्या चारचाकीला गव्याने धडक दिली. यात चारचाकीच्या दर्शनी भागाचे मोठ्या प्रमाणात नुकसान झाले असून डाव्या बाजूच्या दोन्ही दरवाजांचेही मोठ्या प्रमाणात नुकसान झाले आहे. घटनास्थळी गव्याचे केसही कारला अडकलेले दिसत होते. शिरगांव राक्षसघाटी येथे फेब्रुवारी महिन्यातही असाच गव्याने हल्ला केल्याने अपघात झाला होता. तर मार्च महिन्यात शिरगांव – कुवळे मार्गावर गव्याने दुचाकीवर हल्ला करून एका दुचाकीस्वाराला गंभीर जखमी केले होते. शनिवारी राक्षसघाटी येथे गव्याच्या हल्ल्यात चारचाकीचे सुमारे सहा लाखांचे नुकसान झाल्याचा प्राथमिक अंदाज आहे. अपघाताचे वृत्त समजताच स्थानिकांनी घटनास्थळी धाव घेतली. कारमालक प्रकाश गोगटे हे माजी आमदार आप्पा गोगटेंचे चिरंजीव आहेत.
या हल्ल्याने ग्रामस्थ व शेतकरी सुद्धा कमालीचे भयग्रस्त झाले आहेत. वनविभागाने या गवा रेड्यांच्या दहशतीची तत्काळ दखल घ्यायची मागणी होत आहे.
विभाग:
(आपल्या वेबपोर्टल वरील बातम्या, माहिती, लेखन, छायाचित्रे, जाहीराती व संबंधित मजकूर आणि इतर घटकांच्या विश्वासार्हतेची जबाबदारी आपली सिंधुनगरी न्यूज चॅनेल, प्रतिनिधी, संपादन विभाग तसेच आपली सिंधुनगरी न्यूज चॅनेलची नाही, याची कृपया नोंद घ्यावी.)
