शिरगांव | संतोष साळसकर : सिंधुदुर्ग जिल्ह्यातल्या देवगड तालुक्यातील महाळुंगे गांवचे श्री. ओंकार हरिकृष्ण राणे यांनी हरियाणा लोकसेवा आयोगाच्या परिक्षेत उत्तीर्ण होऊन, त्यांची वयाच्या २७ व्या वर्षी हरियाणा राज्यात उद्यान विकास अधिकारी पदी निवड झाली आहे. सिंधुदुर्ग जिल्यातून त्यांची ही एकमेव निवड आहे.

श्री. ओंकार राणे हे शेतकरी कुटुंबातील असून त्याचे प्राथमिक शिक्षण जि. प. महाळुंगे शाळेत झाले. त्यानंतर पुढील शिक्षण त्यांनी फणसगाव व कासार्डे येथे घेतले. त्यांना लहानपणापासून शेतीची आवड असल्याने २०१८ मध्ये कुडाळ तालुक्यातील मुळदे येथील उद्यान विद्या महाविद्यालयात कृषी विषयात पदवी प्राप्त केली. तसेच २०२१ मध्ये पंजाब – लुधीयाना येथील कृषी विशवविद्यालयात पदव्युत्तर शिक्षण घेतले. त्यानंतर सन २०२३ मध्ये हरियाणा राज्यातील चंदिगड – पंचकुला येथे हरियाणा लोकसेवा आयोगाची परिक्षा दिली त्यात ते उत्तीर्ण होऊन गुणवत्तेवर नुसार त्याची हरियाणा येथे उद्यान विकास अधिकारी ( हॉर्टीकल्चर डेव्हलपमेंट ऑफिसर ) पदी निवड झाली आहे. सध्या त्यांचे हरियाणात प्रशासकीय कारभाराबाबत प्रशिक्षण सुरु आहे. श्री. ओंकार राणे यांनी त्यांना मिळालेले यश हे जिद्द, चिकाटी व मेहनतीने तसेच आई – वडिलांच्या आशीर्वादाने व काका दिनेश राणे यांच्या मार्गदर्शनाने मिळाले असल्याचे सांगितले. त्यांच्या निवडीबद्दल सर्व स्तरातून अभिनंदन होत आहे.