ब्यूरो न्यूज | नवी दिल्ली : राष्ट्रीय वैद्यकीय आयोगाच्या नव्या मार्गदर्शक तत्वांनुसार देशातील डाॅक्टर मंडळी, ‘राडा’, हुज्जत घालणार्या किंवा भांडण करणार्या रुग्ण किंवा रुग्णांच्या नातेवाइकांच्या वर्तनाला अनुसरुन उपचाराला नकार देऊ शकतात. अलिकडील कालावधीत डाॅक्टर्सवर हल्ला, त्यांच्याशी हुज्जत घालण्याच्या घटना वाढत असल्याने हा निर्णय घेण्यात आल्याचे सांगण्यात आले आहे. डाॅक्टर आता अशा रुग्ण किंवा रुग्णांच्या नातेवाइकांच्या वर्तनाबद्दल राष्ट्रीय वैद्यकीय आयोगाकडे रितसर तक्रार नोंदवू शकतात. आर. एम .पी. ( रजिस्टर्ड मेडिकल प्रॅक्टीशनर) २०२३ च्या सुधारीत अधिसूचनेनुसार आता त्रासदायक रुग्णांना अन्यत्र रेफर करावे व आणीबाणी शिवाय अशांचे उपचार नाकारायचा अधिकार देण्यात आला आहे. केस हाती घेतल्या नंतर मात्र डाॅक्टरनी उपचार सुरूच ठेवावेत असेही या अधिसूचनेत नमूद केले आहे.

नवीन अधिसूचनेत आता डाॅक्टर्सना कोणत्याही औषध कंपनीकडून प्रवासी सेवा किंवा भेटवस्तू घेण्यास मनाई करण्यात आली आहे. तसेच उपचारांपूर्वीच रूग्णाचा अपेक्षीत खर्च नातेवाईक व रुग्णांना सांगणे अपरिहार्य करण्यात आले आहे. हे नवीन नियम आता ‘मेडिकल कौन्सिल ऑफ इंडिया’ च्या मेडिकल एथिक्स कोड २००२ ची जागा घेतील असे स्पष्ट करण्यात आले आहे.