आमदार वैभव नाईक यांनी म. वि. आ. सरकारच्या काळात आंबेरी पुलासाठी ६ कोटी २५ लाख रुपयांचा निधी घेतला होता मंजूर करून…!

कुडाळ | देवेंद्र गावडे ( उपसंपादक ) : सिंधुदुर्ग जिल्ह्यातील कुडाळ तालुक्यातल्या आंबेरी पुलाच्या जोडरस्त्याचे काम ठेकेदाराकडून तात्काळ पूर्ण करून घेऊन आंबेरी पुलावरून वाहतूक सुरु करण्याची सूचना काल आमदार वैभव नाईक यांनी सार्वजनिक बांधकाम विभागाच्या उपअभियंता सीमा गोवेकर, शाखा अभियंता श्री. पाटील यांना दिली. याच दरम्यान आमदार वैभव नाईक यांनी आंबेरी पुलाची पाहणी देखील केली. यावेळी शिवसेना उद्धव बाळासाहेब ठाकरे पक्षाचे कुडाळ तालुका संघटक बबन बोभाटे, उपतालुका प्रमुख कृष्णा धुरी, बंड्या कुडतरकर आदी उपस्थित होते.

कुडाळ मालवणचे आमदार वैभव नाईक यांनी महाविकास आघाडी सरकारच्या काळात आंबेरी पुलासाठी बजेट अंतर्गत ६ कोटी २५ लाख रु मंजूर करून घेतले होते या पुलाचे काम आता पूर्ण झाले आहे. मात्र या पुलावरून वाहतूक सुरु करण्यात आलेली नाही. याठिकाणी असलेल्या जुन्या पुलावरूनच सध्या वाहतूक सुरु आहे हा जुना पूल जीर्ण झाला असून पावसाचा जोर वाढला असल्याने तो पूल पाण्याखाली गेल्यास अनेक गावांचा संपर्क तुटणार आहे. त्यामुळे यावर उपाययोजना म्हणून नवीन पुलाच्या रस्त्याचे काम ठेकेदाराकडून तात्काळ पूर्ण करून घेऊन पुलावरून वाहतूक सुरु करण्यात यावी अशी सूचना आमदार वैभव नाईक यांनी सा. बां. विभागाच्या अधिकाऱ्यांना दिली आहे.