खवय्यांसाठी राज्यातील विविध ठिकाणच्या नामांकित मिसळींच्या चविची अनोखी मेजवानी..!

संतोष साळसकर | सहसंपादक : सिंधुदुर्ग जिल्ह्यातील देवगड-कणकवली-वैभववाडीचे आमदार नितेश राणे यांच्या संकल्पनेतून देवगड शहरात रविवारी ६ एप्रिलला देवगड कॉलेज नाका, डॉ. सावंत कंपाउंड येथे भव्य मिसळ महोत्सव भरवण्यात येणार असून कोल्हापूर, पुणे सह राज्यभरातील नामांकित मिसळची चव देवगड वासीय आणि पर्यटक खवय्यांना चाखता येणार आहे. आमदार नितेश राणे यांच्या संकल्पनेतून ३ वर्षांपूर्वी वैभववाडीत संपन्न झालेल्या मिसळ महोत्सवाला वैभववाडी तालुकवासियांसह जिल्ह्याभरातील खवय्यानी उपस्थिती लावत तुफान प्रतिसाद दिला होता. त्यानंतर आता देवगडवासीयांसाठी आमदार नितेश राणे १६ एप्रिल रोजी भव्य मिसळ महोत्सव भरवत आहेत.

१६ एप्रिल रोजी दिवसभर चालणाऱ्या या मिसळ महोत्सवात राज्यभरातील नामांकित असे २५ हून जास्त मिसळ स्टॉल्स असणार आहेत. त्यासोबतच सिने कलाकारांच्या उपस्थितीत सांस्कृतिक कार्यक्रमांची मेजवानीही रसिकांना मिळणार आहे. देवगड हे शहर पर्यटनदृष्ट्या राज्यासह देश – विदेशात पर्यटनाच्या नकाशावर आणण्यासाठी आमदार नितेश राणे मागील काही वर्षे अविरत प्रयत्न करत आहेत. सिंधू फिल्म फेस्टिव्हल, देवगड पवनचक्की येथील सी व्ह्यू असलेले मनोवेधक गार्डन, झिप लाईन, वॅक्स म्युझियम, देशातील पहिले कंटेनर थिएटर हे प्रकल्प आमदार नितेश राणेंनी देवगड शहरात राबवल्यामुळे साहजिकच पर्यटकांची पावले देवगडकडे वळू लागली आहेत. सध्या दहावी, बारावी च्या परीक्षा संपल्यामुळे पर्यटन हंगाम सुरू झाला आहे. तसेच हापुसचा राजा असलेला देवगड हापूस आंबाही मार्केटमध्ये आला आहे. या पार्श्वभूमीवर पर्यटक तसेच खवय्यांना चटकदार मिसळची मेजवानी या मिसळ महोत्सवातून मिळणार आहे.