१९ वर्षाखालील कबड्डी स्पर्धेत मुलींच्या गटामध्ये अजिंक्य पद प्राप्त.

मालवण | प्रतिनिधी :  शिक्षण विभागाच्या वतीने घेण्यात आलेल्या मालवण तालुकास्तरीय शालेय कबड्डी स्पर्धेमध्ये १९ वर्षांखालील मुलींच्या गटामध्ये  मालवणच्या स.का. पाटील महाविद्यालयातील रामभाऊ परुळेकर कनिष्ठ महाविद्यालय मालवण यांनी अंतिम सामन्यामध्ये बाजी मारीत अजिंक्यपद पटकावले असून महाविद्यालयाच्या संघाची जिल्हा पातळीवरील कबड्डी स्पर्धेसाठी  निवड झाली आहे. या सामन्यात सानिया अटक हिने अष्टपैलू खेळाडूची कामगिरी बजावली. तसेच अंतिम सामन्यामध्ये क्षितिजा खरवते हिने देखील तिला चांगली साथ दिली.

मालवण येथील बोर्डिंग ग्राउंड येथे घेण्यात आलेल्या शालेय कबड्डी स्पर्धेचा १९ वर्षाखालील मुलींचा अंतिम सामना रामभाऊ परुळेकर कनिष्ठ महाविद्यालय विरुद्ध टोपीवाला ज्युनिअर कॉलेज या संघामध्ये झाला. शेवटचा सामना पाहण्यासाठी क्रीडा रसिक शेवटपर्यंत जागेवर खिळून बसले होते. हा सामना अटीतटीचा झाला असून रामभाऊ परुळेकर कनिष्ठ महाविद्यालय संघाच्या मुलींनी यामध्ये बाजी मारली. अंतिम सामन्यामध्ये सानिया अटक हिने अष्टपैलू खेळाचे प्रदर्शन दाखविले तर क्षितिजा खरवते, अनुष्का म्हापणकर, पूजा मुणगेकर यांनी चढाईची धुरा सांभाळत उत्तम खेळ दाखविला. तर माधवी तेली, रेश्मा पांढरे, दर्शना भिसे यांनी मोक्‍याच्याक्षणी उत्कृष्ट पक्कड करीत अंतिम सामन्यात टोपीवाला ज्युनिअर कॉलेज या संघास धूळ चारली.

महाविद्यालयाचे प्राचार्य डॉ.एस.ए. ठाकूर यांनी गुलाबपुष्प देऊन संघाचे अभिनंदन व शुभेच्छा दिल्या. रामभाऊ परुळेकर कनिष्ठ महाविद्यालय या संघाला प्रा. हसन खान यांचे मार्गदर्शन लाभले.