लव्ह सेल्फी पाॅईंटचे लवकरच लोकार्पण होणार.

१९९० च्या दशकातील ‘I Love Malvan’ च्या बहुरंगी स्टीकर्सच्या स्मृती पुन्हा जाग्या होणार.

मालवण | सुयोग पंडित : गेल्या काही महिन्यांत मालवण शहरामध्ये पर्यटनाधिष्ठीत सुविधा व तंत्रज्ञान वाढीचे उपक्रम सुरु झाले आहेत.
बिच क्लिनिंग मशीन, बंदरजेटीवर छत्रपतींच्या शूर मावळ्यांचे आकर्षक पुतळे, काॅन्व्हॅक्स मीरर्स यांच्या सारख्या विविध सुशोभीकरणाचे प्रकल्प पर्यटक आणि स्थानिकांसाठी उपलब्ध झाले आहेत.

आता यामध्ये राॅक गार्डन मधील सेल्फी पाॅईंटचाही समावेश होत आहे.
मालवण वासियांसाठी आणि पर्यटकांसाठी मालवणची आठवण म्हणून सुशोभीत केलेल्या ‘सेल्फी पाॅईंटचे’ लवकरच लोकार्पण होणार असल्याची माहिती मालवणचे माजी नगराध्यक्ष महेश कांदळगांवकर यांनी दिली आहे.

सिंधुदुर्ग जिल्ह्यातील मालवण शहर हे जिल्ह्यातील पर्यटनाचे एक आघाडीचे शहर आहे. पर्यटन दृष्ट्या या शहराचा विकास करत असताना शहर सुशोभीकरण करण्याच्या उद्देशाने मालवण शहरात विविध ठिकाणी सुशोभीकरण साठी निधी मिळावा यासाठी आमदार वैभव नाईक यांच्याकडे आपण व आपल्या माजी नगरसेवक सहकार्यांनी मागणी केली होती. त्यानुसार आमदार साहेब यांनी पाठपुरावा करून वेळोवेळी निधी उपलब्ध करून दिला असे माजी नगराध्यक्ष महेश कांदळगांवकर यांनी सांगितले आहे.
समुद्राच्या काठावर असणार मालवण नगरपरिषदचे रॉक गार्डन हे पर्यटकांच्या पसंतीचे पर्यटन स्थळ बनले आहे. डेकोरेटिव्ही लाईट, म्युझिकल फाऊंटन यामुळे लाखो पर्यटक या ठिकाणी भेट देतात. फोटोग्राफीचा आनंद घेतात. या पर्यटकांना मालवण कायम स्मरणात राहावे या उद्देशाने या ठिकाणी आय लव्ह मालवण हा सेल्फी पॉईंट होण्याच्या दृष्टीने सन २०२१ ला रुपये ८ लाख जिल्हा पर्यटन निधीची मागणी करण्यात आली होती आणि ३१ मार्च २०२१ ला ती मागणी रोजी प्रशासकीय मान्यता प्राप्त झाली होती अशी माहिती माजी नगराध्यक्ष महेश कांदळगांवकर यांनी दिली आहे.
यासाठी आमदार वैभव नाईक यांनीही पाठपुरावा करून हा निधी उपलब्ध करून दिला होता. त्या नुसार प्रत्यक्ष कामास सुरुवात होऊन आता ते पूर्णत्वास आलेले आहे आणि यामुळे मालवण च्या पर्यटन सौंदर्यात भर पडलेले आहे. पर्यटकांनी या ठिकाणी सेल्फी काढल्याने मालवण शहर त्यांच्या कायम सुस्मरणात राहणार आहे.

पर्यायाने मालवण मालवण शहराचा पर्यटन दृष्ट्या प्रचार होण्यास मदत होणार आहे.
या कामाचा लोकार्पण सोहळा आमदार वैभव नाईक यांच्या हस्ते लवकरच करण्यात येणार आहे अशी माहिती माजी नगराध्यक्ष महेश कांदळगांवकर यांनी दिली आहे.

मालवण शहरात १९९० च्या दशकात ‘I Love Malvan’ या वाक्याची रेडिअम स्टीकर्स शालेय वह्या, क्रिकेट बॅटस, इलेक्ट्रॉनिक उपकरणे आणि रिक्षा बांधवांच्या वाहनातून सर्रासपणे आढळत असत त्याच आठवणींना आता व्यापक उजाळा देण्याचे काम हा सेल्फी पाॅईंट करणार असल्याची चर्चा आहे.