कणकवली | ब्युरो न्यूज :सिंधुदुर्ग जिल्ह्यातील कणकवली तालुक्यातल्या खारेपाटण चिंचवली रोड नजीक शुकनदीच्या पात्राच्या शेजारी एका अज्ञात व्यक्तीचा मृतदेह आढळला आहे. यामुळे एकच खारेपाटण परिसरात खळबळ उडाली आहे.

याबाबत सविस्तर वृत्त असे की, खारेपाटण येथे आज सकाळी १० च्या सुमराला खारेपाटण – चिंचवली रोड नजीक असलेल्या हसोळटेम्ब नजीक शुक नदीच्या पात्राशेजारी शेरणीच्या झाडात एका अज्ञात व्यक्तीचा मृतदेह नदित मासेमारी करणाऱ्या व्यक्तींना आढळून आला. याबाबतची माहिती खारेपाटण सरपंच रमाकांत राऊत यांनी दिली. तसेच तातडीने पोलीस पाटील दिगंबर भालेकर यांना घटनेची माहिती दिल्यानंतर खारेपाटण पोलीस ठाण्याचे पोलीस नाईक उद्धव साबळे, पोलीस हेडकॉन्स्टेबल पराग मोहिते, यांनी घटनास्थळी तातडीने भेट देऊन मृतदेहाची पाहणी केली. मात्र सदर मृतदेह हा सडलेल्या अवस्थेत असल्याने ओळख पटलेली नाही. कणकवली पोलीस निरीक्षक सचिन हुंदळेकर यांनी देखील तात्काळ खारेपाटण ला भेट देऊन घटनेची माहिती घेतली.

पुढील तपास सुरू करण्यात आल्यानंतर सापडलेल्या अनोळखी पुरुष इसमाच्या मृतदेहाची ओळख पटली असून सदर व्यक्ती ही केरळ येथील असल्याचे स्पॉट पंचनामा केल्यानंतर मिळालेल्या प्राथमिक पुराव्याच्या आधारे स्पष्ट झाले आहे.

खारेपाटण शुक नदी येथे आढळुन आलेले पुरुष जातीच्या इसमाचे बेवारस प्रेत हे केरळ येथील रहिवासी असलेले जि सी सुरेंद्रन वय वर्षे ४३ यांचे असून मयत व्यक्तीच्या खिशात आढळलेल्या कागदपत्रामुळे सदर व्यक्तीची ओळख पटली. त्यांच्या नातेवाईकांशी पोलिसांनी संपर्क केला आहे. शवविच्छेदन केल्यानंतर सदर मृतदेह नातेवाईकांच्या ताब्यात देण्यात येणार आहे. या घटनेचा अधिक तपास कणकवली पोलीस निरीक्षक सचिन हुंदळेकर यांच्या मार्गदर्शनाखाली खारेपाटण पोलीस दूरक्षेत्राचे पोलीस कर्मचारी उद्धव साबळे, पराग मोहिते करीत आहेत.