संतोष साळसकर | ब्युरोचीफ : सिंधुदुर्ग जिल्हा परिषदेमध्ये कार्यरत असलेले जिल्हा परिषदेचे तीन कर्मचारी राज्य मंत्रिमंडळातील मंत्र्यांचे स्वीय सहाय्यक म्हणून लवकरच रुजू होणार आहेत. त्यांच्या नियुक्तीचे आदेश जि. प. प्रशासनाकडे प्राप्त झाले आहेत.

नव्या राज्य मंत्रिमंडळातील तीन मंत्र्यांनी सिंधुदुर्ग जिल्हा परिषदेतील तीन कर्मचाऱ्यांची स्वयं सहाय्यक म्हणून निवड केली आहे. जि. प. अध्यक्षांकडे स्टेनो म्हणून कार्यरत असलेल्या शिल्पा तांडेल यांची राज्याचे ग्राम विकास मंत्री व क्रीडा मंत्री गिरिश महाजन यांच्याकडे स्वीय सहायक म्हणून, तर जि. प. कृषी विभागात वरिष्ठ सहाय्यक म्हणून कार्यरत असलेले अमित तेंडुलकर यांची राज्याचे शालेय शिक्षण मंत्री दीपक केसरकर यांचे स्वीय सहाय्यक म्हणून काम पाहणार आहेत.

वेंगुर्ले पंचायत समितीमध्ये कार्यरत असलेले वरिष्ठ सहाय्यक सुरज देसाई यांनी यापूर्वी सिंधुदुर्गचे माजी पालकमंत्री उदय सामंत यांच्याकडे स्वीय सहायक म्हणून काम करत होते.

जि. प. च्या सामान्य प्रशासन विभागामध्ये नियुक्तीचे आदेश प्राप्त झाले असून लवकरच ते नव्या नियुक्तीवर रुजू होणार आहेत. सिंधुदुर्ग जिल्हा परिषदेकडून एकाचवेळी तीन कर्मचाऱ्यांना मंत्र्यांचे स्वीय सहायक म्हणून पहिल्यांदाच नियुक्ती मिळाली आहे.