संतोष साळसकर | ब्युरोचीफ : सिंधुदुर्ग जिल्ह्यातील देवगड तालुक्यातील चाफेड गाव हा ग्रामीण भागात एकदम टोकाला आणि कणकवली तालुक्याच्या सीमेला लागून वसलेला आहे. या गावाची भौगोलिक परिस्थिती डोंगराळ असून गावठण भागात गेली कित्येक वर्षे मोबाईल धारक मोबाईलच्या नेटवर्क सेवेपासून वंचित आहे. या परिसरात कुठल्याही प्रकारचा मोबाईल टॉवर नसल्यामुळे विद्यार्थी वर्गाचा ऑनलाईन अभ्यास तसेच सुशिक्षित आय टी तरुण नोकरवर्गाला वर्क फ्रॉम होम करण्यास खूपच गैरसोयीचे ठरत आहे. त्यामुळे या परिसरातील मुले ऑनलाईन सेवेच्या शोधात वणवण भटकावे लागते.

चाफेड गावाच्या बाजूला साळशी आणि कुवळे गावात मोबाईल टॉवर आहे. मात्र त्याची सुध्दा रेंज चाफेड गावठण परिसरात उपलब्ध नाही. सध्याचे युग हे डिजिटल युग आहे. भारत सरकारने “मेक इन इंडिया”, ” डिजिटल इंडिया” सुरू केली मात्र आजही खेडोपाडी ग्रामीण भागात आजूनही मोबाईल टॉवर (नेटवर्क) उभारले गेले नसल्यामुळे विद्यार्थी वर्ग, नोकरवर्ग, शेतकरीवर्ग यांना त्याचा ऑनलाईन सेवेचा लाभ घेता येत नाही. शेतकरीवर्गासाठी शासनाने आजपर्यंत विविध योजना राबविल्या आहेत. मात्र ग्रामीण भागात नेटवर्क सुविधा उपलब्ध नसल्यामुळे या योजनांचा लाभ घेता येत नाही.अजूनही पीएम किसान सन्मान योजनेचे लाभार्थी शेतकरी वंचित राहिले आहेत.

कोरोनाच्या दोन वर्षाच्या काळात बहुतांशी विद्यार्थी वर्ग शैक्षणिक ऑनलाईन अभ्यासक्रमापासून वंचित राहिले होते. कुणी आजारी पडल्यास अत्यावश्यक सेवेच्या वेळी लोकांना वैद्यकीय सेवेसाठी अक्षरशः धावपळ करावी लागते. मुंबईहून काही कामानिमित्त आलेले चाकरमानी, नोकरवर्ग आपली नोकरी संदर्भात ऑनलाईन कामासाठी इतर गावच्या ठिकाणी स्थलांतर व्हावे लागते.

याबाबत चाफेड ग्रामपंचायतीने मोबाईल टॉवर उभारण्यासाठी अनेकवेळा पाठपुरावा करूनही अद्याप कुठल्याही कंपनीचा मोबाईल टॉवर मंजूर झालेला नाही. याबाबत ग्रामस्थांनी खासदार विनायक राऊत, आमदार नितेश राणे यांनी आग्रही मागणी केली आहे.