संतोष साळसकर | ब्युरोचीफ :
विठ्ठल नामाची शाळा भरली…विठुचा गजर, हरिनामाचा झेंडा रोविला… पंढरीचा विठ्ठल विटेवरी… हरिनामाचा गजर होतो साळशी गावात… या सारख्या भक्तीगीता बरोबरच टाळ-मृदुंगाच्या व विठ्ठल नामाच्या गजराने अवधी साळशी दुमदुमून गेली. या हरिनाम सप्ताहात साळशी येथील श्री सिध्देश्वर पावणाई प्रासादिक भजन मंडळाने काढण्यात आलेला पौराणिक चित्र देखावा सर्वांचाआकर्षण ठरुन उपस्थितांची मने जिंकली.
ऐतिहासिक वारसा लाभलेल्या व ८४ खेड्यांचा अधिपती असलेल्या देवगड तालुक्यातील साळशी येथील श्री देवी पावणाई देवालयात अखंड हरिनाम सप्ताह १५ सप्टेंबर ते २१ सप्टेंबर या कालावधीत संपन्न झाला. या हरिनाम सप्ताहानिमित्त श्री पावणाई देवालयात आकर्षक विद्युत रोषणाई मंदिर सजावट करण्यात आली होती.
या हरिनाम सप्ताहाच्या कालावधीत वरेरी, मठ बुद्रुक, भरणी , कासार्डे ,चाफेड- घाडीवाडी आणि भोगलेवाडी , आयनल, निरोम, नागवे ,कोळोशी, किंजवडे, कुवळे -घाडीवाडी, बापार्डे ,रेंबवली, शिरगाव, हुंबरणे, बांदिवडे, वळीवंडे आदी गावातुन २० भजनी मेळे सहभागी होवुन हरिनामाचा जागर केला. तसेच कोळोशी येथील नवजीवन भगीनी महिला भजन मंडळाच्या सहभागामुळे हरिनाम सप्ताहाची रंगत आणखीनच वाढली.साळशी -अंगणवाडीनेही हरिनाम सप्ताहात सहभाग घेतला होता.
या अखंड हरिनाम सप्ताहाच्या सातव्या रात्री साळशी येथील श्री सिध्देश्वर पावणाई प्रासादिक भजन मंडळाने रंगीत दिंडी काढून ‘मेगासुर वध’ हा पौराणीक चित्र देखावा सादर करून भाविकांची मने जिंकली. यामध्ये मेगासुर-संतोष नारिंग्रेकर ,जटायू- मिलिंद माळवदे ,बाल हनुमान- धीरज घाडी यांनी भूमिका साकारल्या होत्या. तसेच हिरोजी नाईक, निलेश नाईक, राजेंद्र घाडी, प्रविण नाडणकर व श्रेयस नाडणकर यांनीही आकर्षक वेशभुषा सादर केली होती. या हरिनाम सप्ताहाची सांगता २२ सप्टेंबरला पहाटे काकड आरतीने झाली.
या हरिनाम सप्ताहामुळे साळशी गावात भक्ती मय वातावरण निर्मिती झाली.