कोळंब ग्रामपंचायत सदस्य यशवंत चव्हाण यांचे ते बंधू होत.

मालवण | ब्युरो न्यूज : सिंधुदुर्ग जिल्ह्यातील मालवण जवळच्या कातवडचे रहिवासी आणि मालवण तालुका सहकारी खरेदी विक्री संघाचे खैदा येथील भारत गॅस गोडाऊन या ठिकाणी गोडाऊन किपर असलेले बुलाजी ऊर्फ भाई चंद्रकांत चव्हाण (वय ४०) यांच्या अंगावर लोखंडी गेट पडून त्यांचा दुर्दैवी मृत्यू झाल्याची घटना गुरुवारी रात्री ९:१५ वाजण्याच्या सुमारास गॅस गोडाऊन ठिकाणी घडली.

बुलाजी चव्हाण हे गेली अनेक वर्षे त्या ठिकाणी कामास होते. गुरुवारी रात्री गोडाऊन कंपाऊंडचे लोखंडी गेट बंद करीत असताना लोखंडी गेट त्याचे अंगावर पडून गेट व कातळ भाग यात पडून त्यांना गंभीर दुखापत होऊन त्यांचा जागीच मृत्यू झाला. त्याबाबत संस्थेचे व्यवस्थापक दिनेश पांडुरंग ढोलम यांनी रात्री मालवण पोलीस स्टेशन येथे माहिती दिली. त्यानुसार आकस्मिक मृत्यू म्हणून नोंद करण्यात आली आहे. मालवण पोलीस निरीक्षक विजय यादव यांच्या मार्गदर्शनाखाली पोलिसांनी पंचनामा करून पुढील कार्यवाही केली.
श्री. बुलाजी यांच्या मृत्यूची माहिती मिळताच नातेवाईक व मित्रपरिवार घटनास्थळी दाकल झाले. काही काळ तिथले वातावरण संवेदना बनले होते. दरम्यान तिथे पोलीसही दाखल झाले होते. मालवण तालुका खरेदी विक्री संघाच्यावतीने तात्काळ ५ लाख मदत देण्याचे लेखी पत्र नातेवाईकांना देण्यात आले अशी माहिती पोलिसांच्या वतीने देण्यात आल्याचे सूत्रांकडून समजते.

कै.बुलाजी यांच्या अकाली मृत्यूनंतर परिसरात हळहळ व्यक्त होत आहे. त्यांना भजनाची आवड होती. परिसरात भाई बुवा म्हणून ते ओळखले जात. गावातील धार्मिक सांस्कृतिक कार्यक्रमात त्यांचा उत्स्फूर्त सहभाग असायचा. त्यांच्या पश्चात आई, वडिल, पत्नी, भाऊ, वहिनी, पुतणे असा परिवार आहे. कोळंब ग्रामपंचायत सदस्य यशवंत चव्हाण यांचे ते बंधू होत.