मसुरे | प्रतिनिधी :
५६ वी महाराष्ट्र राज्य कॅरम अजिंक्यपद आणि आंतरजिल्हा स्पर्धा २०२२ – २३ दिनांक १३ ते १६ ऑगस्ट दरम्याने विरार येथे पार पडली. या स्पर्धेमधे महिला सांघिक गटामधे मुंबई, पुणे, ठाणे, पालघर आणि सिंधुदुर्ग असे ५ संघ सहभागी झाले होते. सिंधुदुर्गच्या पदक विजेत्या संघात केशर निर्गुण, सावंतवाडी (कर्णधार ), दिक्षा चव्हाण, कणकवली, प्रणिता आयरे व मयुरी गावडे, सावंतवाडी ह्या ४ ज्युनिअर गटातील मुली सहभागी झाल्या होत्या.

आंतरराष्ट्रीय व राष्ट्रीय खेळाडूंसह स्पर्धेत उतरलेल्या मुंबई आणि पुण्याच्या संघाविरुद्ध दुहेरीचा सामना सहज जिंकत मॅचमधे सनसनाटी निर्माण केल्यानंतर एकेरी सामन्यात तीन गेमपर्यंत कडवी झुंज दिल्यानंतर निसटत्या फरकाने सिंधुदुर्गने सामने गमावले. पालघर व ठाणे संघाविरुद्ध दुहेरी आणि एक एकेरी सामना जिंकत ऐतीहासिक कांस्य पदक पटकावले. संघ व्यवस्थापक म्हणून सावंतवाडीचे राजेश निर्गुण यांनी काम पाहिले.

सिंधुदुर्ग जिल्हा कॅरम संघटनेच्या सध्याच्या कार्यकारिणीने अस्तित्वात आल्यापासून सर्वच स्तरावर उल्लेखनिय कामगिरी बजावली आहे. ज्युनिअर गटाचे राष्ट्रीय खेळाडू घडवल्यानंतर केशर निर्गुण या ज्युनिअर गरातील खेळाडूने २०२१ मधे वरिष्ठ राज्यस्तरीय निवड चाचणी जिंकून जिल्ह्याच्या शिरपेचात अजून एक मानाचा तुरा खोवला. तर सुमारे २० वर्षांनंतर राष्ट्रीय स्पर्धेत महाराष्ट्राच्या वरिष्ठ महिला संघाला अजिंक्यपद मिळवून देताना उपउपान्त्य व अंतिम सामन्यात एकेरी गटाचा सामना जिंकत मोलाची कामगिरी बजावली. तसेच या राष्ट्रीय स्पर्धेत कणकवलीची दिक्षा चव्हाण देखील महाराष्ट्राकडून सहभागी झाली होती.

त्यामुळे या राज्य स्तरावरील सांघिक कांस्य पदकामुळे जिल्ह्यातील कॅरम प्रेमींमधे आनंदाचे आणि उत्साहाचे वातावरण आहे. विविध स्तरातून या विजेत्या महिला संघावर व जिल्हा संघटनेवर अभिनंदनाचा वर्षाव होत आहे.