कणकवली तालुका तेली समाजाच्या वतीने गुणवंत विद्यार्थ्यांचा सत्कार..

संतोष साळसकर | ब्युरोचीफ :
तेली समाज बांधवांनी एकत्रित येऊन आपल्या समाजाच्या उन्नतीसाठी संघटीत झाले पाहिजे.आपल्या तेली समाजातील दहावी,बारावी,पदव्युत्तर अभ्यासक्रमामध्ये तसेच इतर स्पर्धा परीक्षेमध्ये ज्या विद्यार्थ्यांनी सुयश मिळविले आहे.अशा गुणवंत विद्यार्थ्यांच्या पाठीवरती कौतुकाची थाप देण्याचे चांगले कार्य कणकवली तालुका तेली समाज उन्नती मंडळाच्या वतीने करण्यात आले ही बाब निश्चितच कौतुकास्पद आहे.असे गौरवोद्गार कणकवली येथील दंतशल्य विशारद डॉ.प्राजक्ता तेली यांनी केले.
सिंधुदुर्ग जिल्हा तेली समाज उन्नती मंडळ शाखा कणकवलीच्या वतीने कणकवली येथील हाॅटेल उत्कर्षाच्या सभागृहामध्ये आयोजित गुणवंत विद्यार्थ्यांच्या गुणगौरव सोहळ्याप्रसंगी डॉ.प्राजक्ता तेली बोलत होत्या.
यावेळी तेली समाजाचे जिल्हा अध्यक्ष लक्ष्मण तेली, सचिव परशुराम झगडे,आबा तेली,प्रकाश काळसेकर, नंदकुमार आरोलकर, ग्रामसेवक दत्ताञय तळवडेकर तसेच तालुकाध्यक्ष दत्ताराम हिंदळेकर आदी उपस्थित होते.
सुरुवातीला संत जगनाडे महाराज यांच्या प्रतिमेला पुष्पहार अर्पण करून आणि दिप प्रज्वलनाने कार्यक्रमाचे उद्घाटन करण्यात आले.
यावेळी मान्यवरांच्या हस्ते कणकवली तालुक्यामधील तेली समाजातील दहावी, बारावी,पदवी,पदव्युत्तर, गुणवंत विद्यार्थ्यांना भेट वस्तू देऊन गौरविण्यात आले.तसेच समाजासाठी उत्कृष्ट कार्य करणाऱ्या प्रदीप खानविलकर, महेश कोळसुलकर,नंदकुमार आरोलकर,शैलेन्द्र डिचोलकर यांचा यावेळी सत्कार करण्यात आला तसेच लाकडी तेल घाना व्यावसायिक कौस्तुभ तेली याचाही समाजाच्या वतीने सत्कार करण्यात आला.
उपस्थित मान्यवरांनी याप्रसंगी पुढेही विद्यार्थ्यांची शैक्षणिक प्रगती होण्याच्या दृष्टीने तसेच समाजासाठी विविध विधायक उपक्रम समाजातर्फे राबविण्यात येतील असे सांगितले.तसेच काही गुणवंत विद्यार्थ्यांनी आपले मनोगत व्यक्त केले.
संपूर्ण कार्यक्रम यशस्वी होण्यासाठी तालुका उपाध्यक्ष महेश मोंडकर,सचिव अरविंद वायंगणकर,खजिनदार विशाल नेरकर सदस्य सुरेश मालंडकर,भरत तळवडेकर, महादेव तेली,विनोद बंदरकर यांनी विशेष सहकार्य केले.
कार्यक्रमासाठी तालुक्यातील बहुसंख्य गुणवंत विद्यार्थी आणि समाज बांधव उपस्थित होते.कार्यक्रमाचे सूत्रसंचालन परशुराम झगडे यांनी केले.तर शेवटी तालुका सचिव अरविंद वायंगणकर यांनी सर्वांचे आभार मानले.