असलदे गावठण पिराजवळ आज शुक्रवार रोजी सायंकाळी ३.४५ वाजताची ही दुर्घटना..!

शिरगाव/ संतोष साळसकर :
कणकवली तालुक्यातील असलदे गावठण पिराजवळ आज सायंकाळी ३.४५ वाजण्याच्या सुमारास पुण्याहून देवगड कडे येणारी एस .टी आणि नांदगाव कडे जाणारा ट्रक यांच्यात भीषण टक्कर झाली. या अपघाताची भीषणता एवढी तीव्र होती की दोन्ही वाहनांचे खूप नुकसान झाले आहे. तर आतील सुमारे ९ प्रवाशांना किरकोळ दुखापत झाल्याने त्यांना शिरगाव प्राथमिक आरोग्य केंद्रात उपचाराकरिता आणण्यात आले त्यानंतर काही प्रवाशांना पुढील उपचाराकरिता कणकवली येथे पाठविण्यात आले.

पुणे – देवगड एस.टी आणि लिंगडाळ येथून कोल्हापूरच्या दिशेने चिरे वाहतूक करणाऱ्या ट्रक यांच्यात असलदे येथे आज भीषण टक्कर झाल्याने एस.टी तील पुढील ९ प्रवाशांना किरकोळ दुखापत झाली. त्यात कौशिक दीपक तळेकर ( वय – १६. दारोम), दीपक अर्जुन तळेकर ( वय – ५०, दारोम), बाळकृष्ण शांताराम चव्हाण ( वय – ५३ तोरसोळे), सीमा दीपक तळेकर ( वय – ३५ दारोम), रेश्मा रघुनाथ साटम ( वय – ५३, शिरगाव), रघुनाथ मारुती साटम ( वय -६०, शिरगाव), सिध्दी राजेंद्र मोंडकर ( वय – २१,देवगड), शैलजा प्रभाकर पवार ( वय – ५८, तोरसोळे), सूरज राजाराम कोयंडे ( वय – ४४, मळई- देवगड). आदी प्रवाशांना किरकोळ दुखापत झाल्याने त्यांना प्राथमिक उपचाराकरिता शिरगाव येथील प्राथमिक आरोग्य केंद्रात आणण्यात आले.येथील वैद्यकीय अधिकारी डॉ. वाय.एस. चव्हाण यांनी उपचार केले. त्यापैकी काही प्रवाशांना पुढील उपचाराकरिता कणकवली येथे पाठविण्यात आले.
या अपघाताची माहिती मिळताच असलदे सरपंच पंढरी वायंगणकर,प्रशांत तांबे,सुमेध तांबे यांनी मदतीसाठी धाव घेतली.या घटनेची माहिती मिळताच कणकवली चे पोलीस उपनिरीक्षक सागर खंडागळे,ठाणे अमलदार चंद्रकांत झोरे,श्री. गुरव यांनी घटनास्थळी पंचनामा केला. या अपघाताची माहिती मिळताच शिरगाव येथील सामाजिक कार्यकर्त्यांनी मदतीसाठी धाव घेतली.