शिरवल गावच्या विकासासाठी स्व.शेखर शिरसाट यांचे योगदान अतुल्य असल्याचे जिल्हा बॅंक संचालक सुशांत नाईक यांचे प्रतिपादन.

कणकवली | प्रतिनिधी : आपण समाजाचे देणे लागतो या भावनेतून स्व.शेखर‌ शिरसाट यांनी शिरवल सारख्या ग्रामीण भागात कला, क्रीडा,शैक्षणिक,सांस्कृतिक,आरोग्य विषयक विविध उपक्रम राबवुन सामाजिक बांधिलकी जोपासत आपल्या कर्तृत्वाचा वेगळा आदर्श समाजासमोर ठेवलाआहे.त्यांचे समाजसेवेचे हे कार्य सर्वांनाच प्रेरणादायी आहे.असे प्रतिपादन सिंधुदुर्ग जिल्हा बँक संचालक तथा शिवसेना युवासेना जिल्हाप्रमुख सुशांत नाईक यांनी केले.
सुशांत नाईक हे शिरवल रतांबेवाडी येथे स्व.शेखर शिरसाट यांच्या चौथ्या स्मृतीदिनानिमित्त आयोजित कार्यक्रमात बोलत होते.यावेळी व्यासपीठावर रविकांत सावंत, प्रमोद सावंत, दत्तात्रय प्रभूपाटकर, प्रविण तांबे आदी उपस्थित होते.
यावेळी पुढे बोलताना सुशांत नाईक म्हणाले की, शेखर शिरसाट हे समाजसेवेचा वसा जपणारे आदर्श व्यक्तिमत्व होते.ते‌ सच्चा आणि कट्टर शिवसैनिक होते.शिवसेना ‌कळसुली उपविभाग प्रमुखपदी कार्यरत असताना त्यांनी पदाला न्याय मिळवून देताना पक्षसंघटना वाढीसाठी मेहनत घेतली.आणि निवडणूकीत पक्षाला चांगले मताधिक्य दिले.त्यांच्या निधनाने समाजाचे आणि शिवसेना पक्षाचे खूप मोठे नुकसान झाले आहे.
शिरवल गावच्या विकासासाठी त्यांचे मोठे योगदान राहिले आहे.त्यांच्या समाजसेवेच्या विचारांचा वारसा स्व.शिरसाट मित्र मंडळ जोपासत असून सलग चार वर्षे विविध सामाजिक उपक्रम राबवून त्यांच्या स्मृती जपण्याचे काम स्व.शेखर शिरसाट मित्रमंडळ करीत आहे.निश्चितच समाजासाठी एक वेगळा आदर्श मंडळाने निर्माण केला आहे.असेही श्री.नाईक यावेळी म्हणाले.

यावेळी स्व.शेखर शिरसाट यांच्या प्रतिमेला श्री.सुशांत नाईक यांनी पुष्पहार अर्पण करुन अभिवादन केले.यावेळी प्रमोद नानचे, आनंद प्रभुपाटकर, सुरेश कोदे,शरद शिरसाट,अनिल कुडतरकर,प्रविण कोरगावकर,सिद्धेश राणे, प्रशांत कुडतरकर,अमोल सावंत, श्रीकृष्ण यादव,तुळशीदास कुडतरकर, गुरुप्रसाद वंजारे‌‌,योगेश कोदे,वैभव कोदे, राज प्रभूपाटकर आदी उपस्थित होते.
यावेळी शिरवल विविध कार्यकारी सहकारी सेवा सोसायटीच्या निवडणुकीत निवडून आलेल्या शिवसेनेच्या नवनिर्वाचित संचालक रविकांत सावंत,भिकाजी सावंत, रविकांत तांबे,दयानंद कोदे,विष्णू ताम्हाणेकर, चंद्रकांत कुडतरकर, सुमित्रा कुडतरकर,यांचा सुशांत नाईक यांच्या हस्ते शाल,श्रीफळ आणि पुष्प गुच्छ देऊन सत्कार करण्यात आला.

यावेळी सुशांत नाईक यांचा स्व.शेखर शिरसाट मित्र मंडळाच्या वतीने शरद शिरसाट यांनी शाल,श्रीफळ आणि पुष्पगुच्छ देऊन सत्कार केला.यावेळी‌ स्व.शेखर शिरसाट प्रेमी बहुसंख्येने उपस्थित होते.