शिवसेना नेते संदेश पारकर यांनी वेधले महामार्ग प्राधिकरणाचे लक्ष

कणकवली | उमेश परब : कणकवलीत वाहतूक कोंडीच्या समस्या एक प्रमुख समस्या निर्माण झाली आहे. कणकवली एसटी स्टँड समोरील उड्डाण पुलाखालून एसटी स्टॅन्डमधून बाहेर जाणाऱ्या व एसटी स्टॅन्डमध्ये येणाऱ्या एसटीसाठी एकच मार्ग ठेवल्याने ही समस्या अजून गंभीर झाली आहे. त्यामुळे एसटी स्टँड मधून बाहेर जाणाऱ्या एसटीसाठी अजून एक मार्ग तयार करा. याकरीता पुलाखाली केलेले बॅरिकेट काढण्यात यावे अशी मागणी शिवसेना नेते संदेश पारकर यांनी महामार्ग प्राधिकरणाचे उपअभियंता मण्यार यांच्याकडे केली. यावेळी शहरातील महामार्गासंबंधित इतर समस्यांवरही शिवसेनेकडून प्रकाश टाकण्यात आला. यावेळी शिवसेना गटनेते नगरसेवक सुशांत नाईक देखील उपस्थित होते.

कणकवली शहरातील हायवेलगतचे पथदिवे सुरू करावे, दोन्ही बाजूच्या सर्विस रोड चे ड्रेनेज खुले करावे, आर. ओ. डब्ल्यू. मधील अतिक्रमण हटवावी, तसेच कणकवली शहरातील महामार्गा लगतच्या विविध ठिकाणच्या रिक्षा स्टॅन्डसाठी कायमस्वरूपी जागा मिळावी, आदी मागण्यांसाठी संदेश पारकर यांनी कार्यकारी अभियंता सलीम शेख यांचे फोनद्वारे संपर्क साधत लक्ष वेधले. सलिम शेख यांनी येत्या आठ दिवसात मागणी केलेल्या कामांबाबत तोडगा काढण्यात येईल, असे आश्वासन दिले. यावेळी उपअभियंता श्री. मण्यार, पोलीस निरीक्षक अजमुद्दिन मुल्ला, दिलीप बिल्डकॉनचे कन्स्ट्रक्शन मॅनेजर समर सिंग, अभियंता अभिजीत पाटील व शहरातील काही रिक्षाचालक उपस्थित होते.