कणकवली | उमेश परब (सिंधुदुर्ग ब्युरोचीफ ): सिंधुदुर्ग जिल्ह्यातल्या कणकवली येथील शिवसैनिक संतोष परब यांच्या हल्ला प्रकरणातील मुख्य आरोपी ज्ञानेश्वर उर्फ माऊली दिगंबर देवणुरे (३४ ), धीरज व्यंकटेश जाधव (३६, दोन्ही रा.पुणे) असे दोन आरोपी कणकवली पोलीस ठाण्यात काल स्वतः हजर झाले. पोलिसांनी त्यांना रितसर अटक करत वैद्यकीय तपासणी केली असून प्राथमिक चौकशी केली जात आहे.

या प्रकरणात दोन्ही आरोपींना शुक्रवारी कणकवली न्यायालयात हजर करण्यात येणार असल्याचे पोलीस सूत्रांनी सांगितले. सिंधुदुर्ग जिल्हा बँक निवडणूक कालावधीतच शिवसैनिक संतोष परब यांच्यावर कणकवलीत त्यांना झाला होता. हे प्रकरण राज्यात गाजले होते, याप्रकरणी आमदार नितेश राणे व माजी जिल्हा परिषद अध्यक्ष गोट्या सावंत यांच्यासह अन्य आरोपींना यापूर्वीच अटक झाली आहे. आतापर्यंत दोन आरोपी वगळता सर्व आरोपींना पोलिसांनी अटक केली होती, दोषारोपपत्र देखील दाखल करण्यात आलेला आहे.

दरम्यान, गुरुवारी कणकवली पोलिस ठाण्यात या प्रकरणातील मुख्य संशयित ज्ञानेश्वर उर्फ माऊली दिगंबर देवणुरे (३४ ), धीरज व्यंकटेश जाधव (३६, दोन्ही रा.पुणे) हे दोन आरोपी फरार होते. आता मात्र ते स्वतःहून हजर झाले. ताबडतोब पोलिसांनी त्यांना ताब्यात घेत अटकेची कारवाई केली आहे.

त्यानंतर कणकवली उपजिल्हा रुग्णालयात त्यांची वैद्यकीय तपासणी करून प्राथमिक चौकशी कणकवली पोलीस करत आहेत. याप्रकरणी या दोन्ही आरोपींना उद्या कणकवली न्यायालयात हजर करण्यात येणार आहे,अशी माहिती पोलीस सूत्रांनी दिली आहे. या प्रकरणी ११ आरोपींची नावे निश्चित करण्यात आली आहेत.त्यापैकी १० आरोपींना अटक करण्यात झाली आहे. अधिक तपास कणकवली पोलीस निरीक्षक सचिन हुंदळेकर करीत आहेत.