आमदार नितेश राणेंनी जेष्ठ नागरिकांची मागणी केली पूर्ण

कणकवली | उमेश परब : कोरोना लसीकरणसाठी जेष्ठ नागरिकांसाठी वेगळे डोस ठेवावेत अशी मागणी जेष्ठ नागरिक संघाचे अध्यक्ष दादा कुडतरकर यांनी नगराध्यक्ष समीर नलावडे यांच्यामाध्यमातून आमदार नितेश राणे यांच्याकडे केली होती. नगराध्यक्ष समीर नलावडे यांनी केलेल्या पाठपुराव्याने या मागणीची तात्काळ दखल घेत आमदार नितेश राणे यांनी जेष्ठ नागरिकांसाठी कणकवलीत सेपरेट १००डोस उपलब्ध करून दिले आहेत. आज १७ ऑगस्ट रोजी होणाऱ्या लसीकरण मध्ये कणकवली कॉलेज च्या इमारतीत जेष्ठ नागरिकांना १०० डोस वेगळे ठेवण्यात आले आहेत. सध्या कोव्हीड लसीकरणाचे महत्व कळू लागल्यामुळे नागरिकांचा लस टोचून घेण्याकडे वाढता कल आहे. लस कमी आणि लाभार्थी जास्त असे चित्र प्रत्येक लसीकरण केंद्रावर असून उपलब्ध डोस संपल्यानंतर उर्वरित नागरिकांना माघारी परतावे लागते. हा त्रास जेष्ठ नागरिकांनाही होतो. रांगेत तिष्ठत राहूनही डोस न मिळताच जेष्ठ नागरिकांना घरी यावे लागते. यावर उपाय म्हणून जेष्ठ नागरिकांसाठी विशेष सोय म्हणून वेगळा कोटा ठेवण्याची मागणी जेष्ठ नागरिक संघाचे अध्यक्ष दादा कुडतरकर यांनी केली होती. नगराध्यक्ष नलावडे यांनी ही बाब आमदार नितेश राणेंच्या कानावर घालताच तात्काळ आमदार नितेश यांनी तालुका आरोग्य अधिकारी डॉ. संजय पोळ यांच्याशी चर्चा करून जेष्ठ नागरिकांसाठी विशेष कोटा ठेवण्याचे निर्देश दिले. त्यानुसार आज कणकवली कॉलेजमध्ये होत असलेल्या लसीकरण केंद्रावर जेष्ठ नागरिकांसाठी १०० डोस राखीव ठेवण्यात आले आहेत. याचा लाभ घेत जेष्ठ नागरिकांनी लसीकरण करून घेण्याचे आवाहन जेष्ठ नागरिक संघाचे अध्यक्ष दादा कुडतरकर यांनी केले आहे. जेष्ठ नागरिकांसाठी कोव्हीड लस चा विशेष राखीव कोटा ठेवल्याबद्दल आमदार नितेश राणे, नगराध्यक्ष समीर नलावडे यांचे आभार मानले आहेत.