कणकवली | उमेश परब (सिंधुदुर्ग ब्युरोचीफ): कणकवलीतील छत्रपती शिवाजी महाराजांच्या पुतळ्याच्या सुशोभीकरण व स्थलांतराला करिता शहराचा प्रथम नागरिक म्हणून कणकवली शहरातील सर्व्हिस रोडवर असलेल्या छत्रपती शिवाजी महाराजांच्या पुतळ्याच्या स्थलांतरण व सुशोभीकरणासाठी सहा महिन्याचे नगराध्यक्षपदाचे मानधन सुमारे ९० हजार रुपयांची रक्कम छत्रपती शिवाजी महाराज चौक मित्र मंडळ यांना देण्याची घोषणा कणकवली नगराध्यक्ष समीर नलावडे यांनी केली.

यापूर्वी नगराध्यक्षपदाचे मानधन रोजंदारीवर असणाऱ्या मजुरांना ‘कमळ थाळी’ करिता व त्यापूर्वी नगराध्यक्षपदाच्या मानधनाची रक्कम ‘शहीद जवानांच्या’ कुटुंबियांना देण्यात आली होती. त्याच प्रमाणे पुढील सहा महिन्याचे मानधन छत्रपती शिवाजी महाराज यांच्या पुतळ्याकरिता देण्यात येणार आहे.

यापूर्वी कणकवली नगरपंचायतकडून पुतळा स्थलांतरणा करिता पाचशे चौरस फुटाच्या जागेचा ठराव व त्या अनुषंगाने बाबी नगरपंचायतीने जिल्हाधिकाऱ्यांकडे सोपवल्या आहेत. पालकमंत्री आणि आमदार नितेश राणे यांच्या माध्यमातून पुतळा स्थलांतरण या संदर्भात पाठपुरावा सुरू आहे. हे काम अंतिम टप्प्यात आलेले असताना, पालकमंत्र्यांकडून या १८ गुंठे जागेची मोजणी देखील करून घेण्यात आली. त्यामुळे कणकवली शहराचा प्रथम नागरिक म्हणून मी या कामाकरिता माझा हातभार लागावा म्हणून हा निर्णय घेतल्याचे नलावडे यांनी सांगितले. यावेळी उपनगराध्यक्ष बंडू हर्णे, नगरसेवक अभिजीत मुसळे, ॲड. विराज भोसले, महेश सावंत आदी उपस्थित होते.