कणकवली | उमेश परब (सिंधुदुर्ग ब्युरोचीफ) : सध्या सिंधुदुर्ग जिल्ह्यातील बहुचर्चित आमदार नितेश राणे यांच्या संदर्भात आणखीन एक घडामोड जिल्ह्याच्या राजकीय व सामाजिक वर्तुळात घडली आहे. सध्या न्यायालयीन कोठडीत असलेल्या भाजप आमदार नितेश राणे यांना अधिक उपचारासाठी कोल्हापूर येथील शासकीय रुग्णालयात हलविण्यात आले आहे.

१०८ रुग्णवाहिकेने त्यांना जिल्हा रुग्णालयातून नेण्यात आले आहे.
शिवसैनिक संतोष परब हल्ला प्रकरणी ४ फेब्रुवारीला नितेश राणे यांना न्यायालयीन कोठडी कणकवली न्यायालयाने सुनावली होती. त्यानंतर त्यांची तब्बेत बिघडल्याने त्यांना जिल्हा रुग्णालयात उपचारासाठी दाखल करण्यात आले होते. यावेळी त्यांना जास्त त्रास जाणवू लागल्याने ५ रोजी त्यांना कोल्हापूर शासकीय रुग्णालयात नेण्याची तयारी केली होती. मात्र, त्यानंतर पुन्हा जिल्हा रुग्णालयात ठेवण्याचा निर्णय घेण्यात आला होता. आज अचानक त्यांना कोल्हापूर येथे नेण्याचा निर्णय घेत १०८ रुग्णवाहिकेने नेण्यात येत आहे. काही वेळा पूर्वी रुग्णवाहिका रवाना झाली आहे. सोबत डॉक्टरांचे एक पथक तसेच चोख पोलीस बंदोबस्त ठेवण्यात आला आहे. मात्र, नेमका कोणता आजार आहे हे जाणून घेण्यासाठी जिल्हा शल्य चिकित्सक डॉ श्रीपाद पाटील यांना संपर्क साधण्याचा प्रयत्न केला असता त्यांनी माध्यमांना यांवर अद्याप कोणतीही प्रतिक्रिया दिलेली नाही .