पाच गायी मृत झाल्याच्या पार्श्वभूमीवर पशुसंवर्धन विभागाची खबरदारी.

शेतकऱ्यांनी सावधगिरी बाळगण्याचे डॉ. अनिल तेली यांचे आवाहन.

चौके | अमोल गोसावी : मालवण तालुक्यातील काळसे गावात दोन दिवसांत, पाच शेतकऱ्यांच्या प्रत्येकी एक अशा पाच गायी अज्ञात आजाराने मृत्युमुखी पडल्यानंतर पशुसंवर्धन विभागाने तातडीने याची दखल घेतली असून सहाय्यक पशुधन विकास अधिकारी अनिल तेली यांनी काळसे गावातील गुरांना ” एच. एस.” ही लस देण्यास सुरुवात केली आहे. जेणेकरुन सदर आजाराची इतर गुरांना लागण होऊ नये. गुरुवार २८ ऑक्टोबर पासून सुरू करण्यात आलेल्या या लसीकरण मोहिमेसाठी डॉ. तेली यांना अजित प्रभु, अण्णा गुराम, रमेश मयेकर, रोहित परब संजय परब आणि गावातील इतर शेतकऱ्यांचे सहकार्य मिळत आहे.
अचानकपणे मृत झालेल्या सर्व गायींना झालेल्या
अज्ञात आजाराचे अद्याप अचूक निदान झाले नसुन हा आजार ‘बोटुलीझम सदृश्य’ असू शकतो असा अंदाज डॉ. अनिल तेली यांनी यावेळी व्यक्त केला. तसेच प्रामुख्याने मृत जनावरांची हाडे चघळल्याने गुरांना हा आजार होतो. त्यामुळे काळसे गावातील शेतकऱ्यांनी आपल्या गुरांना पुढील आठ ते दहा दिवस गोठ्यातच बांधून ठेवावे. आणि ग्रामस्थांनी कोंबडी , कुत्रा, मांजर अथवा गुरे आदी जनावरे मृत झाल्यास त्यांचे मृतदेह उघड्यावर न टाकता ते लगेच जमिनीत पुरावेत. असे केल्यास सदर रोग लगेच आटोक्यात येईल असे आवाहनही सहाय्यक पशुधन विकास अधिकारी डॉ. अनिल तेली यांनी केले आहे.