मसुरे | प्रतिनिधी : अक्कलकोट श्री वटवृक्ष मंदिरात गुरुवार, १० जुलै रोजी सालाबादप्रमाणे यंदाही मोठ्या भक्तीभावाने गुरुपौर्णिमा उत्सव संपन्न होणार असल्याची माहिती श्री वटवृक्ष स्वामी महाराज देवस्थान समितीचे चेअरमन महेश इंगळे यांनी दिली.

या मंदिरात येणारे भाविक स्वामींना गुरु मानून या दिवशी दर्शनाकरीता विशेष गर्दी करतात. गुरुंचे गुरु, सदगुरुंचे गुरु तथा गुरुंचा महिमा म्हणजे येथील वटवृक्ष निवासी ब्रम्हांडनायक श्री स्वामी समर्थ महाराज व श्री वटवृक्ष स्वामी महाराज देवस्थान होय. गुरुपौर्णिमेनिमित्त श्री वटवृक्ष स्वामी महाराज देवस्थानच्या वतीने जय्यत तयारी करण्यात आली आहे. भाविकांसाठी ठिकठिकाणी पिण्याच्या पाण्याची सोय, मंदिरात येण्यासाठी एक रस्ता, बाहेर जाण्यासाठी एक रस्ता, दोन ठिकाणी चप्पल स्टँड, साऊंड सिस्टीमवर स्वामींच्या भक्तीगीतांचे वादन, विशेष दर्शन रांगेचे नियोजन, पावसापासून संरक्षणा करीता दक्षिण महाद्वार ते गेटपर्यत पत्राशेड उभा करण्यात आले आहे.

गुरुपौर्णिमेदिवशी वटवृक्ष मंदिरात नित्य नियमाने होणारी काकड आरती पहाटे ४ वाजता होईल. यानंतर पुरोहित मोहनराव पुजारी व मंदार महाराज पुजारी यांच्या हस्ते गुरुपुजन होईल. तत्पूर्वी सालाबादाप्रमाणे भाविकांची वाढती गर्दी लक्षात घेता व भाविकांना स्वामी दर्शन सुलभतेने होण्याकरीता मंदिराचे महाद्वार गुरुपौर्णिमे रोजी रात्री २ वाजता उघडण्याचा व गर्दीच्या अनुषंगाने मंदिरात स्वामी भक्तांचे नित्यनियमाने होणारे अभिषेक बंद ठेवण्याचा निर्णय मंदीर समितीने घेतला आहे. भाविकांनी अभिषेकाची पावती केल्यास प्रसाद मिळेल. सकाळी ११:३० वाजता नियमितपणे संपन्न होणारी महानैवेद्य आरती गुरुपौर्णिमे रोजी सकाळी १०:३० वाजता संपन्न होईल. दुपारी १२ ते ३ या वेळेत देवस्थानच्या मैंदर्गी- गाणगापूर रोडवरील भक्त निवास येथे सर्व स्वामी भक्तांसाठी भोजन महाप्रसादाची सोय देवस्थानच्या वतीने करण्यात आली आहे. दर गुरुवारी रात्री ८ वाजता मंदिरात साजरा होणारा श्रींचा पालखी सोहळा गुरुपौर्णिमे रोजी रात्री ७ वाजता संपन्न होईल व यानंतर लगेच शेजारती संपन्न होईल याची सर्व स्वामी भक्तांनी नोंद घ्यावी. येणाऱ्या स्वामी भक्तांनी श्रींच्या दर्शनाचा, सेवेचा व भोजनप्रसादाचा व मंदीरातील श्रींच्या पालखी सोहळ्याचा लाभ घ्यावा, आवाहन मंदिर समितीच्या वतीने समितीचे चेअरमन व माजी नगराध्यक्ष तथा मा. नगरसेवक महेश इंगळे यांनी केले आहे.