मालवण | प्रतिनिधी : कुंभारमाठ येथे सोमवार, २६ मे रोजी ‘प्रजापिता ब्रह्माकुमारी ईश्वरीय विश्व – विद्यालय’ या संस्थेच्या गीता पाठशाळेचे उद्घाटन करण्यात आले. परशुराम पवार यांच्या घरी गेले २५ वर्षे गीता पाठशाळा सुरू आहे. या पाठशाळेचा नूतनीकरण कार्यक्रम नुकताच संपन्न झाला. या उद्घाटनप्रसंगी सुरूवातीला ध्वजाला वंदन करून दीपप्रज्वलन करण्यात आले.

यावेळी व्यासपीठावर माउंट आबूचे वरिष्ठ राजयोगी छोटेलाल भाई, पुणे सबझोन असिस्टंट प्रमुख राजयोगिनी नलिनी दीदी, पुणे – मिरा सोसायटी प्रमुख उषादीदी, गोवा सबझोन प्रमुख राजयोगिनी शोभा दीदी, कणकवली केंद्रप्रमुख संध्या दीदी हे मान्यवर उपस्थित होते. मान्यवरांचा शाल, श्रीफळ आणि परम पिता परमात्मा शिव यांच्या प्रतिमा देऊन सत्कार करण्यात आला.

याप्रसंगी राजयोगी छोटेलाल भाई म्हणाले की, आपण जे विचार करू तशी परिस्थिती बदलते. सकारात्मक विचार जीवन सुखदायी करतात तर नकारात्मक विचारांनी जीवन दुःखदायी होते.

तसेच राजयोगिनी नलिनी दीदी म्हणाल्या की, ह्या सेवाकेंद्रामुळे तंटामुक्त, व्यसनमुक्त समाज निर्मितीसाठी, तणावमुक्तीसाठी राजयोगचा चांगला उपयोग होईल.

राजयोगिनी शोभा दीदी म्हणाल्या की, इथे सर्व सेवा विनामूल्य असून या ईश्वरीय ज्ञानाची सर्वांना गरज आहे. राजयोग अर्थात मनाच्या एकाग्रतेने विश्व एकता व आपापसात विश्वास निर्माण होऊन हे जग स्वर्ग बनेल. शाहीर

या कार्यक्रमात कोल्हापूरचे शाहीर बापू भाईंनी कुंभारमाठ गाव तसेच परशुराम पवार यांच्या जीवनावर आधारित पोवाडा सादर केला.

रौप्य महोत्सवी वर्षानिमित्त केक कापून ह्या पाठशाळेचा उद्घाटन सोहळा संपन्न झाला.

अशाप्रकारच्या गीता पाठशाळेचे उद्घाटन रविवार, २५ मे रोजी राठिवडे येथेही झाल्याची माहिती देण्यात आली आहे.

यावेळी परशुराम पवार यांच्या पत्नी आणि त्यावेळच्या संचालिका कै. शोभा पवार यांच्या तृतीय स्मृती दिनानिमित्त प्रतिमेला पुष्पहार अर्पण करून त्यांचे स्मरण करण्यात आले.

यावेळी मालवणच्या प्रमुख वर्षा दिदी आणि गोवा, कोल्हापूर, राजापूर, तसेच सिंधुदुर्ग जिल्ह्यातून नागरिक उपस्थित होते. कार्यक्रमाचे सूत्रसंचालन मडगाव केंद्रप्रमुख राखी दीदी यांनी केले.