मालवण | प्रतिनिधी : कोकण मराठी साहित्य परिषदेच्या मुंबईच्या दादर शाखेच्यावतीने आयोजित आनंद सोहळ्यात कोकण मराठी साहित्य परिषदेचे संस्थापक अध्यक्ष पद्मश्री मधु मंगेश कर्णिक यांचा ९५ वा वाढदिवस साहित्य संबंधित उपक्रमांनी साजरा होत आहे. यामध्ये कोकण मराठी साहित्य परीषदेच्या सभासदांनी प्रकाशित केलेल्या ‘९५ किलो पुस्तकांची तुला’ होणार आहे.

शुक्रवार दि. २५ एप्रिल २०२५ रोजी सायंकाळी ५.३० वा. मुंबईच्या रवींद्र नाट्यमंदिर प्रभादेवी येथे या सोहळ्याचे आयोजन करण्यात आले असून या सोहळ्यासाठी राज्याचे उद्योग व मराठी भाषा मंत्री उदय सामंत सांस्कृतिक कार्य व माहिती तंत्रज्ञान मंत्री ॲड. आशिष शेलार, माजी खासदार रामशेठ ठाकूर उपस्थित राहणार आहेत. याप्रसंगी कोकण मराठी साहित्य परिषदेच्या सभासदांनी प्रकाशित केलेल्या ९५ किलो पुस्तकांची पुस्तक तुला करण्यात येणार असल्याची माहिती कोमसाप जिल्हा समन्वयक रुजारिओ पिंटो यांनी दिली आहे.

रुजारिओ पिंटो ( जिल्हा समन्वयक, कोमसाप)

ग्रंथतुलेमध्ये कोमसाप मालवणचे अध्यक्ष व साहित्यिक सुरेश ठाकुर यांची सिंधु साहित्य सरिता, बीज अंकुरे अंकुरे, येगं येगं सरी अशी ३ पुस्तके, कोमसाप जिल्हा समन्वयक व कवी रुजारिओ पिंटो यांची माऊली, आम्ही मालवणी, दर्याच्या देगेर अशा ३ पुस्तकांचा समावेश आहे.

श्री. सुरेश ठाकुर ( अध्यक्ष, कोमसाप मालवण.)

ग्रंथतुलेसाठी पाठवलेल्या अन्य लेखकांची पुस्तके खालीलप्रमाणे आहेत.

बुलंद जंजिरा सिंधुदुर्ग ( माधव कदम), कल्याण कटोरा ( वैशाली पंडित ), मालवणीतल्या वाटा ( गोविंद काजरेकर), दोन समाजवादी स्नेही ( शंभू भाऊ बांदेकर), भक्ती लिलामृत भाग १, २ व श्री दत्त साक्षात्कारी संत( सीताराम करमरकर), सिंधुदुर्गातील कविता ( वैभव साटम), आठवणीतले नामवंत( रविंद्र वराडकर ), सुक्या सुंगटाची कढी ( सुयोग पंडित) अशा पुस्तकांच्या प्रत्येकी दोन प्रती मिळून एकूण ३० पुस्तकांचा समावेश आहे.