देवाच्या स्वागतार्थ भाविकांचा उत्साह ; कांदळगाव – ओझर – कोळंब मार्गावर दुतर्फा रांगोळी आणि भगव्या ध्वजांसह गुढ्या.

मालवण : तालुक्यातील कांदळगाव येथील श्री देव रामेश्वर देवस्थानचा पूर्वापार परंपरेनुसार स्वयंभू देव रामेश्वर पालखी, तरंग, राणे – परब मानकरी व रयत मंडळीसह ‘वेशी फिरणे’ कार्यक्रम ( २०२५) ला ९ फेब्रुवारी रोजी दुपारपासून सुरुवात झाली. कांदळगाव येथील रामेश्वर मंदिर येथून श्री देव रामेश्वराने पालखीत बसून देव तरंग, राणे – परब व रयतेसह वेशी फिरणे कार्यक्रमासाठी प्रस्थान केले. देवाच्या स्वागतासाठी कांदळगाव – ओझर – कोळंब मार्गावर भाविकांनी भव्य रांगोळ्या काढल्या होत्या आणि रस्त्याच्या दुतर्फा भगवे ध्वज फडकवत गुढ्या देखील उभारल्या होत्या.

श्री देव रामेश्वर मंदिरातून प्रस्थान केल्यावर भाविकांनी संपूर्ण मार्गावर ठिकठिकाणी स्वागत केले. श्री देव रामेश्वर ओझर नाक्यावर दाखल झाल्यावर त्याठिकाणी भाविकांकडून उत्स्फूर्तपणे स्वागत करण्यात आले. त्यानंतर कोळंब खडवण नाका येथे भाविकांकडून भव्य स्वागत करण्यात आले. यावेळी उपस्थित शेकडो भाविकांनी दर्शनाचा लाभ घेतला. या दरम्यान ओझर येथे डंपर व वाळू व्यावसायिकांच्या वतीने भाविकांना शीतपेय, लाडू आणि अल्पोपहाराचे वाटण्यात आला.

सायंकाळी श्री देव रामेश्वर कोळंब मांगरी येथे भेटीस आल्यानंतर भाविकांकडून स्वागत करण्यात आले. या सोहळ्यात मोठ्या संख्येने भाविक सहभागी झाले होते. देवस्थान ट्रस्ट पदाधिकारी, विश्वस्त सदस्य, राणे – परब मानकरी व कांदळगाव ग्रामस्थ सहभागी झाले.

सोहळ्यात उद्या दि. १० फेब्रुवारी रोजी कोळंब मांगरी येथील देव महापुरुष येथे दुपारी महाप्रसाद, दुपारनंतर न्हिवे येथे प्रस्थान करणार आहे. दि. ११ रोजी न्हिवे येथे दुपारी महाप्रसाद, दुपारनंतर महान येथे प्रस्थान, १२ रोजी दुपारी महान गांगेश्वर मंदिर येथे महाप्रसाद, दुपारनंतर कांदळगाव रवळनाथ मंदिरकडे प्रस्थान, १३ रोजी सकाळी रवळनाथ मंदिरातून कांदळगाव साळकरवाडी येथे प्रस्थान, तेथून पुन्हा माघारी येताना परबवाडी मोठ्या तुळशीजवळ महाप्रसाद, दुपारनंतर रवळनाथ मंदिराकडे प्रस्थान, १४ रोजी रवळनाथ मंदिर येथून राणेवाडी येथे प्रस्थान, दुपारी राणेवाडी मध्यवर्ती मोठी तुळस येथे महाप्रसाद, दुपारनंतर रामेश्वर मंदिर येथे रवाना, रात्री रामेश्वर मंदिर येथे पाच दिवसीय वेशी फिरणे कार्यक्रमाची रितीरिवाजानुसार सांगता करण्यात येणार आहे. कार्यक्रमाला भाविकांनी उपस्थित रहायचे आवाहन कांदळगाव रामेश्वर देवस्थान तर्फे करण्यात आले आहे.