गोपनीय माहिती व प्राप्त तक्रारींच्या अनुषंगाने पोलिसांची धडक कारवाई मोहीम सुरू राहणार : मालवण पोलीस निरीक्षक प्रवीण कोल्हे.

मालवण | प्रतिनिधी : सिंधुदुर्ग जिल्ह्यातील मालवण शहर परिसरातन गेल्या काही दिवसात पोलिसांकडे प्राप्त होणाऱ्या तक्रारी अनुषंगाने तसेच मागील काही दिवसात रात्रीच्या वेळी घडलेल्या काही वादाच्या घटना पाहता पोलिस प्रशासनाने धडक मोहीम हाती घेतली आहे. रात्री ११ ते सकाळी ६ या ‘नाईट लाईफ’ च्या काळात तशी कारवाई मोहीम विशेष पथकाच्या माध्यमातून सूरू राहणार आहे अशी माहिती मालवण पोलीस निरीक्षक प्रवीण कोल्हे यांनी दिली.

रात्री उशिरा रस्त्यावर काही ठिकाणी गर्दी व गोंगट असणे, भरधाव वेगात तसेच कर्णकर्कशपणे मोटरसायकल व अन्य वाहने चालवणे, दारू पिऊन नशेत वाहने चालवणे याबाबत काही तक्रारी संबंधित वाहनांच्या क्रमांकांसह आल्या आहेत असे पोलिस निरीक्षक प्रवीण कोल्हे यांनी स्पष्ट केले असून या कारवाई मोहिमेदरम्यान अशी संबंधीत वाहने दिसून आल्यास त्यावर नियमानुसार धडक पोलिसी कारवाई केली जाणार आहे असेही त्यांनी सांगितले.

मध्यरात्री पर्यत सूरू असणार्या अशा पान टपरी, चायनीज दुकाने, हॉटेल की ज्या ठिकाणी वादाच्या घटना यापूर्वी घडल्या आहेत किंवा घडत असतील अशा ठिकाणांवर सर्वांनी या नियमांचे काटेकोर पालन करावे अशा सूचना देखील पोलिस निरीक्षक प्रवीण कोल्हे यांनी दिल्या आहेत.

चायनीज दुकाने, हॉटेल याठिकाणी कोणत्याही ग्राहकाला मद्य सेवनास बसू देऊ नये असे सांगत त्यांनी बहुतांश ठिकाणी नियमांचे पालन योग्य पद्धतीने होते हे स्पष्ट केले. मात्र कुठल्याही ठिकाणी कोणी ग्राहक हॉटेल मध्ये येऊन दादागिरी दमदाटी पद्धतीने दारू पिण्यास बसत असेल तर हॉटेल व्यवस्थापनाने तात्काळ पोलीस ठाण्याशी संपर्क साधावा असे आवाहन केले.

अवैध दारू विक्री, अमली पदार्थ विक्री काही ठिकाणी होते. याबाबतही काही गोपनीय तक्रारी प्राप्त झाल्या आहेत. त्या ठिकाणी अधिक माहिती घेऊन कारवाई केली जाणार आहे. तरी कोणत्याही ठिकाणी जसे की सार्वजनिक ठिकाणे, रस्ते, पर्यटन ठिकाणे व अन्य अंतर्गत मार्ग अश्या सर्व ठिकाणी अवैध दारू अथवा अन्य अमली पदार्थ घेण्याच्या उद्देशाने कोणी संशयीत व्यक्ती दिसून येत असतील तर तात्काळ पोलीस ठाण्याशी संपर्क साधावा. पोलीस पथक त्या ठिकाणी तात्काळ पोहचून कारवाई करेल असे पोलीस निरीक्षक प्रवीण कोल्हे यांनी स्पष्ट केले आहे.