खासदार विनायक राऊत संसदेत मच्छिमारांचे प्रश्न मांडत असताना राणेंनी कधी पाठिंबा का दिला नाही ; शिवसेना शहरप्रमुख व मच्छिमार नेते बाबी जोगी आणि उपशहरप्रमुख व मच्छिमार नेते सन्मेष परब यांचा भाजपाच्या रविकिरण तोरसकरांना प्रतिसवाल..!

मालवण : शिवसेना ( उ. बा. ठा. ) शहरप्रमुख व मच्छिमार नेते पृथ्वीराज उर्फ बाबी जोगी आणि उपशहरप्रमुख व मच्छिमार नेते सन्मेष उर्फ राजू परब यांनी भाजपा मच्छिमार सेलचे जिल्हा संयोजक रविकिरण तोरसकर यांच्यावर सवालांच्या फैरी झाडल्या आहेत. रविकिरण तोरसकर यांनी एका प्रसिद्धी पत्राद्वारे केंद्रीय मंत्री नारायण राणे यांना मच्छिमार व मत्स्य व्यावसायिक यांनी निवडून देऊन लोकसभेत पाठवायचे आवाहन केले होते आणि नारायण राणे हे मच्छिमारांची जाण असलेले नेते असल्याचे सांगितले होते त्यावर बाबी जोगी आणि सन्मेष परब यांनी तोरसकरांना घेरले आहे.
नारायण राणे यांची जर प्रशासनावर पकड आहे आणि मच्छिमारांच्या प्रश्नांची जाण आहे तर केंद्र शासनाच्या अखत्यारीत १२ नॉटिकल माइल च्या बाहेरचे विनाशकारी व मच्छीमारांच्या जीवावर आणि पोटावर उठणारे एलईडी पर्सेसीन बोट तसेच परप्रांतीय हाय स्पीड ट्रॉलर्स का बंद नाही होत?ह्या गोष्टी बंद करण्यासाठी नारायण राणेंची प्रशासनावरील पकड हरवली आहे का? संसदेत कॅबिनेट मंत्री असताना मच्छीमारांचे किती प्रश्न राणे यांनी मांडले?खासदार विनायक राऊत यांनी संसदेत प्रश्न मांडत असताना त्यांना राणे यांनी पाठिंबा का दिला नाही, असे विविध सवाल शिवसेना उबाठा शहरप्रमुख पृथ्वीराज उर्फ बाबी जोगी आणि सन्मेष परब यांनी प्रसिद्धी पत्राद्वारे केले आहेत.
ज्याप्रमाणे शेती करणाऱ्या जागेचा शेतकऱ्यांच्या नावावर जमिनीचा सातबारा असतो त्या धरतीवर समुद्रावर उपजीविका करणारे मच्छिमार त्यांच्या नावावर समुद्रातील सातबारा करणे हा प्रश्न पहिल्यांदाच खासदार विनायक राऊत यांनी संसदेत मांडला असेही बाबी जोगी आणि सन्मेष परब यांनी नमूद केले आहे.

पर्ससीन नेट कोणामुळे वाढले त्यांच्या पाठीमागे कोण होते पारंपरिक मच्छीमारांवर खोटे केसेस कोणामुळे दाखल झाले त्या पाठीमागे कोण होते, मच्छिमारांना पावसाळी बंदी कालावधीतील अनुदान तसेच जाळी खरेदीवरील अनुदान कुठच्या मच्छिमारांना मिळाले, पारंपरिक मच्छीमारांवर काळी दिवाळी साजरी करण्याची वेळ कोणामुळे आली आणि काळी दिवाळी साजरी करा हे सांगणारे मच्छीमार नेते आता नारायण राणे यांची तळी उचलत आहेत हे यांचे दुर्दैव असल्याचे प्रसिद्धी पत्राद्वारे सांगितले आहे.

या सर्व गोष्टींचा विचार लक्षात घेऊन आजवरच्या परंपरेप्रमाणे किनारपट्टीचा मच्छीमार बांधव हा शिवसेना उद्धव बाळासाहेब ठाकरे पक्षाच्या पाठीमागे राहील अशी ग्वाही मच्छिमार नेते पृथ्वीराज उर्फ बाबी जोगी आणि सन्मेष परब यांनी प्रसिद्धी पत्राद्वारे दिली आहे.