शिरगांव | संतोष साळसकर : सिंधुदुर्ग जिल्ह्यातील देवगड तालुक्यातल्या शिरगांवचा दर बुधवारी भरणारा आठवडा बाजार या आठवड्यात मंगळवार, ३० जानेवारी रोजी भरविण्यात येणार आहे. जिल्हा व्यापारी महासंघाचा बुधवारी मालवण येथे मेळावा होत असल्याने शिरगाव व्यापारी संघटनेने हा निर्णय घेतला आहे, अशी माहिती व्यापारी संघटनेचे अध्यक्ष दादा पारकर यांनी दिली आहे.

शिरगांव येथील आठवडा बाजारासाठी आजूबाजूच्या तालुक्यांतील तसेच गावांतील फिरते व्यापारी, दशक्रोशीतील ग्राहक खरेदी- विक्रीसाठी येत असतात. दरवर्षी व्यापारी संघटनेचा जिल्हा मेळावा प्रत्येक तालुक्यात होत असतो. यावर्षी मालवण येथे बुधवार, ३१ जानेवारी रोजी हा मेळावा होत आहे. या दिवशी संपूर्ण जिल्ह्यातील व्यापारी आपापल्या आस्थापना बंद ठेवून या मेळाव्यात सहभागी होणार आहेत. त्यामुळे या दिवशी होणारे सर्व आठवडा बाजार आदल्या दिवशी म्हणजे मंगळवारी भरविण्यात येणार आहेत. त्या अनुषंगाने शिरगाव येथील बुधवारी भरणारा आठवडा बाजार मंगळवार, ३० जानेवारी रोजी भरविण्यात येणार आहे. दर बुधवारी आठवडा बाजारासाठी शिरगाव येथे येणारे फिरते व्यापारी व ग्राहकांनी मंगळवारी भरणाऱ्या बाजाराला खरेदी- विक्रीसाठी यावे, असे आवाहन शिरगाव व्यापारी संघटनेच्यावतीने करण्यात आले आहे.