गिरीधर पुजारे | विशेष सांस्कृतिक प्रतिनिधी : सिंधुदुर्ग जिल्ह्यातील मालवण तालुक्यातल्या पळसंब येथे सालाबाद प्रमाणे ह्याही वर्षी सात प्रहराचा हरीनाम सप्ताह आज दिनांक २३/११/२०२३ रोजी संपन्न होत आहे. हा सप्ताह म्हटलं की बालपण आठवतं, पहिले ते एस एस सी पर्यंत शिक्षण गांवीच झाल्यामुळे गावात होणारे प्रत्येक कार्यक्रमात सहभागी असायचो. दसरा संपला कि देवीचा जागर सुरू होतो. एक महीना चाललेल्या या जागरात मुख्यता पावले नृत्य सराव आणि नवीन काहीतरी शिकायला मिळायचे. खरं पावले नृत्य म्हणजे पुर्वजानी एक व्यायामशाळा उघडली होती. शरीराला पूर्णपणे मोकळं करणं हे ह्यातून नकळत घडत होते. साधारणपणे शेतीची कामगिरी संपत आली की हे सांस्कृतिक कार्यक्रम सूरू होतात. ह्यातून मनोरंजन उत्तम आरोग्य आणि मनःशांती मिळते. कोकणात आषाढी एकादशीला तेवढं वातावरण नसते. पण कार्तिकी एकादशीला गांवागांवात प्रत्यक्ष पंढरपूर उभं राहते. याचा अनुभव मी लहाणपणापासून घेतला आहे.

साधारण सिंधुदुर्ग जिल्ह्यात प्रत्येक गांवात हरिनाम सप्ताह वेगवेगळ्या तारखेला होतो. कुणी सात प्रहर कुणी सात दिवस करतात. मग वारकरी मंडळी ह्या गावातून दुसर्‍या गांवात हरिनाम सेवा करायला जात असतात. आता पूर्वीपेक्षा सुखसोई वाढल्या त्यामुळे नवीन पिढी खूप उत्साहात साजरा करायला लागली. पावले नृत्यात ही आमुलाग्र बदल झाला आहे. खरं मिडियाने हे नृत्य आवर्जून पहावे, म्हणजे ह्या कलेला एक उच्च असे व्यासपीठ मिळेल. तसे गावागावात स्पर्धा भरवतात पण ती त्यापूर्ती मर्यादित राहते. हरिनाम सप्ताह मुळे जून्या आठवणी जाग्या झाल्या म्हणून हे शब्दबद्ध केले. श्री विठ्ठल रखुमाई आणि श्री आई जयंती देवी रवळनाथ चरणी प्रार्थना करतो कि त्यांनी सर्व भक्तांना सुखसमृद्धी निरोगी आरोग्य आणि शिक्षण या सर्व गोष्टीचे आशिर्वाद ध्यावे.