सहवेदना

मालवण | सुयोग पंडित : कीर्तनकार म्हणून मार्मिक शैलीतून भक्तीरसाचा जागर करणारे सुप्रसिध्द कीर्तनकार बाबामहाराज सातारकर यांचे आज नेरुळ येथे निधन झाले. ते ८९ वर्षांचे होते. ज्येष्ठ मार्मिक शैलीतील कीर्तनकार म्हणून ते ओळखले जात होते. महाराष्ट्राच्या कानाकोपर्यात त्यांच्या कीर्तनाचे श्रवण केले जात होते. १९९० च्या दशकात दूरदर्शनच्या माध्यमातून त्यांच्या कीर्तनांचे प्रसारण होत असताना अनेक समाज प्रबोधनात्मक अध्यात्मिक चळवळींचा देखील उदय झाला होता. त्या दरम्यान त्यांचे ५ वर्षांचे नातू त्यांना कीर्तनात साथ देत असत हा सुद्धा बाल भक्ती व बाल संस्कारांच्या आकर्षणाचा विषय होता.

नेरूळ येथील त्यांचे निधन झालं आहे. गेल्या काही दिवसांपासून ते आजारी असल्याची माहिती समोर येत आहे. बाबा महाराज यांच्या निधनाने वारकरी सांप्रदायावर शोककळा पसरली आहे. बाबा महाराज सातारकर यांच्या पार्थिवावर उद्या शुक्रवारी २७ ऑक्टोबरला संध्याकाळी ५ वाजता नेरुळ येथे अंत्यसंस्कार होणार आहेत. दरम्यान, बाबा माहाराज सातारकर यांचं पार्थिव आज दुपारी ३ नंतर अंतिम दर्शनासाठी नेरूळ जिमखान्यासमोर असलेल्या विठ्ठल रुक्मिणी मंदिरात ठेवण्यात येणार आहे.

बाबा महाराज सातारकर यांचा जन्म ५ फेब्रुवारी १९३६ रोजी साताऱ्यात झाला. त्यांनी त्या काळी दहावीपर्यंतचे शिक्षण इंग्रजी माध्यमातून घेतले होते. बाबा महाराज सातारकर यांच्या घरी शेकडो वर्षांपासून वारकरी सांप्रदायाची परंपरा आहे. गेल्या काही दिवसांपासून त्यांना कीर्तनासाठी उभे राहता येत नसल्याने त्यांचे नातू चिन्मय महाराज सातारकर यांनी कीर्तन परंपरा पुढे चालू ठेवलेली आहे.