पिता पुत्रानी मागितली माफी ; महिलेने मानले मनसे पदाधिकारी व कार्यकर्ते यांचे आभार.

मुंबई | ब्युरो न्यूज : महाराष्ट्र राज्याची राजधानी आणि देशाची आर्थिक राजधानी असलेल्या मुंबई शहरातच मराठी माणसांची व मराठीची गळचेपी अशी विविध उदाहरणे समोर येत असतानाच सोशल मिडियावरुन काही गंभीर गोष्टी निदर्शनास येऊ लागल्या आहेत.

मुंबईतल्या मुलुंड या उपनगरात तृप्ती देवरुखकर या मराठी महिलेला केवळ ‘मराठी’ असल्याने व्यवसायाला जागा नाकारण्यात आली. या घटनेचा व्हिडीओ तृप्ती देवरुखकर यांनी त्यांच्या फेसबुकवर पोस्ट केला आणि तो व्हायरल झाला. आता या प्रकरणी मुलुंड पोलीस ठाण्यात गुन्हा दाखल करण्यात आला आहे. तृप्ती यांना ऑफिस थाटण्यासाठी जागा हवी होती. मात्र ‘मराठी नॉट अलाऊड’ म्हणत ही जागा नाकारण्यात आली होती. ज्या गुजराथी पिता पुत्रांनी हे केले त्यांच्याविरोधात गुन्हा दाखल करण्यात आला आहे.

तृप्ती देवरुखकर नावाच्या एका महिलेनं सोशल मीडियावर एक व्हिडीओ पोस्ट केला होता. मुलुंड (पश्चिम) मधल्या ‘शिवसदन’ नावाच्या इमारतीमध्ये घर बघण्यासाठी त्या गेल्या होत्या. मात्र, सोसायटीचे गुजराती सेक्रेटरी व त्यांच्या वडिलांनी “महाराष्ट्रीयन व्यक्तींना आम्ही घर देत नाही” असे सांगून नकार दिला. यातून वाद वाढला व देवरुखकर यांनी त्या बाचाबाचीचा व्हिडिओ मोबाईलमध्ये शूट करायला सुरुवात केली. पण त्यावरूनही या बापलेकानं अरेरावी करत त्यांचा मोबाईल काढून घेतला. त्यांनी आपल्या पतीलाही मारल्याचा दावा तृप्ती देवरुखकर यांनी फेसबुकवर पोस्ट केलेल्या व्हिडीओमध्ये केला आहे.

घडला प्रकार तृप्ती देवरुखकर यांनी सोशल मीडियावर टाकल्यानंतर ‘मनसे’ पक्ष कार्यकर्ते व पदाधिकारी यांनी त्याची दखल घेऊन थेट शिवसदन सोसायटी गाठली आणि दोघांनाही जाब विचारला. त्या दोघांनी नंतर माफीही मागितली.

या घटनेची दखल घेतल्या बद्दल आपण मनसे पक्ष कार्यकर्ते व पदाधिकाऱ्यांचे आभारी आहोत, असे तृप्ती देवरुखकर यांनी पुन्हा एक व्हिडिओ पोस्ट करून सांगितले आहे. दरम्यान या घटनेची दखल आता महिला आयोगानेही व विविध राजकीय नेते मंडळींनीही घेतली असल्याचे सूत्रांकडून समजते आहे.