मुंबई | ब्युरो न्यूज : महाराष्ट्र राज्यभरातील ज्या उमेदवारांनी तलाठी भरती परीक्षा दिली आहे त्यांना २८ सप्टेंबर ते ८ ऑक्टोबरदरम्यान उत्तरपत्रिका पाहण्यासाठी (Answer Key) उपलब्ध करुन देण्यात येणार आहे. उत्तरपत्रिका पाहण्यासाठी संबंधित उमेदवारांच्या ऑनलाइन लॉगिनमध्ये सोय करण्यात आली आहे. उमेदवारांना काही हरकत असल्यास परीक्षा घेणाऱ्या कंपनीकडे नोंदविता येणार आहे. त्यासाठी १०० रुपये शुल्क भरावे लागणार आहे.

तलाठी भरती परीक्षा पार पडल्यानंतर आता भूमी अभिलेख विभागाकडून पुढील प्रक्रिया सुरु करण्यात आली आहे. त्यानुसार आता परीक्षा दिलेल्या उमेदवारांना उत्तर पत्रिका (Answe Key) पाहण्यासाठी सोय उपलब्ध करुन देण्यात येत आहे.

उत्तरे पाहिल्यानंतर उमेदवारांना काही शंका, आक्षेप हरकत असल्यास परीक्षा घेतलेल्या टीसीएस कंपनीकडून लिंक उपलब्ध करुन देण्यात येणार आहे. त्याकरिता आक्षेप अथवा हरकत नोंदवण्यासाठी १०० रुपये शुल्क आकारले जाणार आहे.

आक्षेप योग्य असल्यास ही रक्कम संबंधित उमेदवाराना परत केले जाणार आहे. तसेच उमेदवारांकडून नोंदविण्यात आलेले आक्षेप टीसीएस कंपनीच्या समितीकडे जातील. या समितीकडून प्राप्त आक्षेपांचे निरसन केले जाणार आहे. अशी माहिती परीक्षा समन्वयकांनी दिली. दरम्यान ही प्रक्रिया झाल्यानंतर निकाल संकेतस्थळावर जाहीर केला जाणार आहे. संकेतस्थळावर जाहिर केलेला निकाल अंतिम असणार आहे.