पनवेल | ब्युरो न्यूज : शैक्षणिक आचारसंहीतेला काल पालघरमध्ये हरताळ फासणारा प्रकार समोर आला आहे. तलासरी तालुक्यातील सूत्रकार डोंगरपाडा या जिल्हा परिषद शाळेतील विद्यार्थ्यांच्या हाती पुस्तकांऐवजी पत्ते असल्याची धक्कादायक बाब समोर आली आहे. इतकेच नाही तर विद्यार्थ्यांना शिकवण्यासाठी शिक्षकाने रोजंदारीवर एका निवृत्त शिक्षकाला ठेवल्याचाही प्रकार घडला आहे. स्वत: शाळेत न जाता मजुरीवर निवृत्ती शिक्षकाला ठेवल्याची घटना घडली आहे.

वर्गातच विद्यार्थी चक्क पत्ते खेळत असल्याचे फोटो समोर आले आहेत. इतकेच नव्हे तर या शाळेतील मूळ शिक्षकानी मजुरीवर शिक्षक नेमल्याचा प्रकारही समोर आला आहे. त्यामुळे ग्रामीण भागातील जिल्हा परिषद शाळांतील विद्यार्थ्यांच्या शिक्षणाचा खेळ खंडोबा झालेला पाहायला मिळत आहे. शाळेत मुलांना शिकवायला शासनाचा गलेलठ्ठ पगार घ्यायचा पण शाळेत न जाता मुलांना शिकवायला मजुरीवर शिक्षक ठेवायचा, असा प्रकार तलासरी तालुक्यात उघड झाला आहे.

तलासरी तालुक्यातील जिल्हा परिषद शाळा सूत्रकार डोंगरपाडा ही इयत्ता पहिली ते चौथीपर्यंतची शाळा. या शाळेत केवळ १ शिक्षक आणि १४ मुले शिक्षण घेतात. तरी सुद्धा या मुलांना शिकवायचा कंटाळा येत असल्याने गलेलठ्ठ पगार घेणाऱ्या शिक्षकाने स्वतः घरी बसून ३०० रुपये रोजंदारीवर एका निवृत्त शिक्षकाला मुलांना शिकवायला ठेवले आहे. पण निवृत्त शिक्षकही काय करणार तोही शाळा राखत निवांत बसून असल्याने मुलेही शिक्षणाची पुस्तके सोडून वर्गातच पत्ते घेऊ डाव मांडतात.

नागरिकांच्या तक्रारीवरुन सूत्रकार डोंगरपाडा येथील शाळेला काल बुधवारी २७ सप्टेंबरला दुपारी भेट देऊन पाहणी केली. यावेळी शाळेत प्रमुख शिक्षक रवी कुमार सुभाष फेरे उपस्थित नसून ते गणपतीसाठी गावी गेल्याचे समजले. तसेच गावी जाताना मुलांना शिकवण्यासाठी ३०० रुपये रोजंदारीवर रामा लोतडा या निवृत्त शिक्षकाला ठेवलेले दिसून आले.