कणकवली | गणेश चव्हाण : सिंधुदुर्ग जिल्ह्यातील कणकवली – आचरा मार्गावर आचरा येथुन कणकवली कडे बिस्कीटे, कुरकुरे घेऊन जाणारा टेम्पो रामगड – सडेवहाळ येथे जागेवरच पलटी होऊन नाटळ बौद्धवाडी येथील रविंद्र कदम हे इसम ( क्लीनर) जागीच मृत झाले. हा अपघात आज ( ८ ऑगस्ट) संध्याकाळी ५ वाजताच्या सुमाराला झाला.

कणकवली येथील एजन्सी चा टेंपो क्र. एम एच ०७ ए. जे. २६६१ हा छोटा टेंपो आचरा येथुन दुकानदारांना बिस्किट, कुरकुरे देत कणकवलीच्या दिशेने जात होता. टेंपोत ड्रायव्हर हर्षल पाताडे व मयत क्लिनर रविंद्र कदम असे दोघेच होते. रामगड सडेवाडी येथे गाडी आल्यावर अचानक गाडीचे स्टिअरींग लाॅक झाल्याने हा अपघात झाला. समोर कोणतेच वाहन, माणसे किंवा जनावरे नसल्याने आणखीन कोणतीही हानी नाही. ड्रायव्हर पाताडे रा. कणकवली यांना दुखापत झाली नाही. गाडीचे मात्र मोठे नुकसान झाले. हा अपघात रामगड येथे सडेवहाळ पुलावर झाला. आचर्‍या हून कणकवलीच्या दिशेने जात असताना डाव्या साईडची गाडी उजव्या बाजूला पलटी झाल्याने, पुलाचे संरक्षण गार्ड सुद्धा तुटले गेले. अशा अवस्थेत ड्रायव्हर काहीच करू शकले नाहीत. परंतु दुर्दैवाने क्लीनरचा जागीच मृत्यू झाला. येथे पूर्णपणे वळण असल्यामुळे समोरच्या गाड्या दिसत नाही. या ठिकाणी या पूर्वीही अनेक अपघात झालेले आहेत.

या अपघाताचे माहिती मिळतात बेळणे पोलीस स्टेशनचे पोलीस हेडकॉन्स्टेबल सहदेव कांबळे व सहकारी सागर कांजर घटनास्थळी लगेच उपस्थित राहून, पंचनामा केला व मयताला कणकवली उपजिल्हारुग्णालयात पाठवले.

मयत रविंद्र कदम टेंपोखाली चिरडल्याने, याच मार्गावरुन जाणार्‍या डंपरच्या सहाय्याने मयत त्यांना बाहेर काढले.

वाहतुक पोलिस हवालदार विकास रा. जाधव व पोलिस काॅन्स्टेबल एम. के. शिरडे यांनी तत्काळ येऊन वाहतुक व्यवस्था सुरळीत केली. यावेळी अपघाताची बातमी समजताच रामगड ग्रामस्थांनी मदतीसाठी सहकार्य केले.